Бізнес-навіны

ММЗ у 2023 годзе прадоўжыць нарошчваць супрацоўніцтва з расійскімі партнёрамі

Фота ММЗ

27 снежня, Мінск /Кар. БЕЛТА/. Мінскі маторны завод у 2023 годзе прадоўжыць нарошчваць супрацоўніцтва з расійскімі партнёрамі. Аб гэтым карэспандэнту БЕЛТА паведамілі ў прэс-службе прадпрыемства.

"Казань, Елабуга, Чэбаксары, Каўроў - у такой вялікай камандзіроўцы па расійскіх гарадах напярэдадні Новага года пабывалі намеснік генеральнага дырэктара Мінскага маторнага завода па якасці прадукцыі і тэхнічным сэрвісе Іван Бакун, спецыялісты ўпраўлення рэалізацыі прадпрыемства і дырэктар Гандлёвага дома ММЗ у Нагінску Сяргей Гайцюкевіч. Пашырэнне прадукцыі Мінскага маторнага і сэрвіснае яе суправаджэнне ў 2023 годзе - пытанні, якія абмяркоўваліся на сустрэчах з расійскімі партнёрамі", - расказалі ў прэс-службе.

"Казаньсельмаш" выкарыстоўвае мінскія рухавікі, чатырох- і шасціцыліндравыя, на самаходных апырсквальніках. У наступным годзе партнёр плануе павялічыць спажыванне матораў ММЗ прыблізна на 30 працэнтаў. Абмяркоўвалася пытанне стварэння сэрвіснага цэнтра па абслугоўванні прадукцыі ММЗ на базе "Казаньсельмаша".

У Елабузе прадстаўнікі мінскага завода наведалі гандлёва-вытворчую кампанію "МТЗ-Татарстан", дзе арганізавана зборка трактароў МТЗ з рухавікамі ММЗ. "На базе гэтага прадпрыемства праводзіцца таксама аднаўленне нашых матораў. Летам бягучага года ў Мінску прайшлі навучанне па сэрвісным абслугоўванні і рамонце нашых рухавікоў 30 спецыялістаў ГВК "МТЗ-Татарстан". У наступным годзе супрацоўніцтва прадоўжыцца", - падкрэслілі ў ММЗ.

Чэбаксарскі завод сілавых агрэгатаў прымяняе рухавікі ММЗ на 3- і 5-тонных пагрузчыках "Сілант". У бліжэйшы час прадпрыемства пачынае вытворчасць малалітражных трактароў, камплектаваць якія плануецца таксама беларускімі маторамі. "Яшчэ адно перспектыўнае пачынанне нашых партнёраў - аўтамабіль для камунальных службаў. Паводле слоў Івана Бакуна, у наступным годзе чэбаксарскае прадпрыемства мае намер закупіць у ММЗ каля 250 рухавікоў розных мадыфікацый", - адзначылі ў прэс-службе.

У склад буйнейшага расійскага холдынга "Трактарныя заводы" ўваходзіць Чэбаксарскі завод прамысловых трактароў. "Супрацоўніцтва з ім пачалося ўжо, праз Гандлёвы дом ММЗ у Нагінску. У камплектацыі бульдозераў на гусенічным ходзе выкарыстоўваюцца і мінскія маторы нараўне з ЯМЗ. У час сустрэчы ішлі перагаворы аб павелічэнні паставак беларускіх рухавікоў, а таксама аб стварэнні сэрвіснага цэнтра па абслугоўванні дызеляў ММЗ. Дарэчы, у снежні ў Мінску прайшлі вучобу спецыялісты з Чэбаксараў", - паведамілі на прадпрыемстве.

Каўроўскі электрамеханічны завод у адыходзячым годзе сабраў каля 320 пагрузчыкаў з рухавікамі ММЗ. "У наступным годзе гэту лічбу партнёры плануюць павялічыць на 40 працэнтаў, паколькі мінскія рухавікі зарэкамендавалі сябе вельмі добра, ад спажыўцоў паступаюць толькі станоўчыя водзывы", - канстатавалі ў прэс-службе.

Намеснік генеральнага дырэктара Іван Бакун упэўнены, што надыходзячы новы год прынясе Мінскаму маторнаму заводу пашырэнне супрацоўніцтва з расійскімі партнёрамі.

Мінскі маторны завод - вытворца сучасных дызельных, газадызельных, газапоршневых рухавікоў. Спецыялізуецца на распрацоўцы, праектаванні і вытворчасці сучасных трох-, чатырох-, шасці- і васьміцыліндравых рухавікоў. На заводзе выпускаецца больш за 100 мадыфікацый рухавікоў у дыяпазоне магутнасці ад 7 кВт да 330 кВт, прызначаных для ўстаноўкі на сельскагаспадарчую, дарожна-будаўнічую тэхніку, аўтамабілі і аўтобусы, энергаўстаноўкі, кампрэсары і іншыя агрэгаты. Рухавікі ММЗ пастаўляюцца на канвееры 49 прадпрыемстваў Беларусі, краін СНД і далёкага замежжа, прадукцыя прадаецца ў больш як 50 краін Еўропы, Азіі, Афрыкі, Паўночнай і Лацінскай Амерыкі. Пры вытворчасці рухавікоў выкарыстоўваюцца камплектуючыя сусветна вядомых кампаній.

версія для друку

зрабіць стартавай

дабавіць у выбранае