Бізнес-навіны

ММЗ паставіць каля 2 тыс. дызельных рухавікоў Чэбаксарскаму заводу сілавых агрэгатаў

Фота ММЗ

11 ліпеня, Мінск /Кар. БЕЛТА/. Мінскі маторны завод і Чэбаксарскі завод сілавых агрэгатаў падпісалі пагадненне аб супрацоўніцтве, паведамілі карэспандэнту БЕЛТА ў прэс-службе прадпрыемства.

Выстаўка ІНАПРАМ-2023 праходзіць гэтымі днямі ў Екацярынбургу. Беларуская экспазіцыя прадстаўлена больш як 120 прадпрыемствамі. Сярод іх Мінскі маторны завод. "Выставачныя экспанаты прадстаўлены найноўшымі мадыфікацыямі рухавікоў, дызель-генератарнымі ўстаноўкамі, дызель-помпавымі ўстаноўкамі і кампрэсарнымі станцыямі", - расказалі ў прэс-службе.

Сёння генеральны дырэктар Мінскага маторнага завода Аляксандр Батвіннік і генеральны дырэктар Чэбаксарскага завода сілавых агрэгатаў Аляксандр Дзмітрыеў падпісалі пагадненне аб супрацоўніцтве, згодна з якім ММЗ забяспечыць пастаўку каля 2 тыс. дызельных рухавікоў. На сустрэчы прысутнічаў кіраўнік Чувашскай Рэспублікі Алег Нікалаеў.

Чэбаксарскі завод сілавых агрэгатаў спецыялізуецца на вытворчасці хадавых сістэм да прамысловых трактароў цяжкага класа, вытворчасці і канвеерных пастаўках вузлоў і камплектуючых для дарожна-будаўнічай тэхнікі, сельскагаспадарчых і лясных трактароў, аўтамабільнай прамысловасці, кампанентаў да рухавікоў Яраслаўскага маторнага завода. ЧЗСА мае ў складзе сваёй вытворчасці найноўшы комплекс абсталявання, які ў сукупнасці з выбудаванай арганізацыйнай структурай забяспечвае поўны інавацыйны цыкл: прыём заказаў на асваенне новай прадукцыі - распрацоўка - вытворчасць - рэалізацыя - сэрвіснае абслугоўванне.

Мінскі маторны завод - вытворца сучасных дызельных, газадызельных, газапоршневых рухавікоў. Спецыялізуецца на распрацоўцы, праектаванні і вырабе сучасных трох-, чатырох-, шасці - і васьміцыліндравых рухавікоў. На заводзе выпускаецца больш за 100 мадыфікацый рухавікоў у дыяпазоне магутнасці ад 7 кВт да 330 кВт, прызначаных для ўстаноўкі на сельскагаспадарчую, дарожна-будаўнічую тэхніку, аўтамабілі і аўтобусы, энергаўстаноўкі, кампрэсары і іншыя агрэгаты. Рухавікі ММЗ пастаўляюцца на канвееры прадпрыемстваў Беларусі, краін СНД і далёкага замежжа. Пры вытворчасці рухавікоў выкарыстоўваюцца камплектуючыя сусветна вядомых кампаній.

версія для друку

зрабіць стартавай

дабавіць у выбранае