Бізнес-навіны

ММЗ аснасціў рухавікамі пагрузчыкі Каўроўскага электрамеханічнага завода

Фота КЭМЗ

4 снежня, Мінск /Кар. БЕЛТА/. Мінскі маторны завод аснасціў рухавікамі міні-пагрузчыкі Каўроўскага электрамеханічнага завода (Расія), паведамілі карэспандэнту БЕЛТА ў прэс-службе беларускага прадпрыемства.

"Дзякуючы мінскаму рухавіку завяршылася лакалізацыя флагманскага міні-пагрузчыка АNТ-1000 Каўроўскага электрамеханічнага завода (КЭМЗ)", - адзначылі ў прэс-службе.

Сумесны праект расійскага і беларускага заводаў стартаваў у пачатку 2019 года па выніках рабочай паездкі ў горад Каўроў генеральнага дырэктара ММЗ Аляксандра Рагожніка і тэхнічнага дырэктара Ігара Анушкевіча. Перагаворы аб перспектыўным супрацоўніцтве на электрамеханічным заводзе былі праведзены па некалькіх напрамках. Адным з іх стала камплектацыя чатырох пагрузчыкаў мінскімі рухавікамі: на АNТ-750 планавалася ўстанаўліваць матор MMZ-4DT, на АNТ-3000 - Д-260, на АNТ-2321 - Д-245S2. Чацвёртай мадэллю для эксперыменту быў выбраны АNТ-1000 з аснашчэннем рухавіком Д-243S2. З яго і пачаліся работы.

Расійскія спецыялісты прадставілі 3D-мадэль падкапотнай прасторы машыны, а беларускія маторабудаўнікі скампанавалі для яго сувымерную 3D-мадэль рухавіка. "Канструктар" склаўся ідэальна, патрабавалася, каб рухавік адпавядаў габарытным памерам маторнага адсека і забяспечвалася падключэнне ўсіх сістэм. Спецыяльна для расійскага партнёра было створана новае выкананне рухавіка - Д-243S2-2778. Мадыфікацыя, па сутнасці, эксклюзіўная, адпрацаваная пад заказчыка з улікам усёй складанасці тэхналагічнага працэсу", - расказалі ў ММЗ.

Пасля фарміравання камплектацыі матора быў выраблены доследны ўзор і накіраваны расіянам у кастрычніку 2019 года. А ўжо ў красавіку бягучага года завяршыліся прыёмачныя выпрабаванні пагрузчыка АNТ-1000 з рухавіком ММЗ. Партнёры засталіся задаволены цягава-скораснымі характарыстыкамі, узроўнем расходу паліва і іншымі паказчыкамі, у выніку зрабілі заяўку на пастаўку 60 матораў Д-243S2-2778, якая на сёння ўжо выканана.

Цяпер першая партыя з 20 новых АNТ-1000 адгружана пакупнікам (устаноўка на машыны астатніх рухавікоў прадаўжаецца). На гэтых пагрузчыках мінскі рухавік замяніў японскія і еўрапейскія маторы, што стала завяршальным этапам лакалізацыі вытворчасці. Раней КЭМЗ знайшоў замену іншым імпартным камплектуючым у Расіі. Згодна з пастановай урада РФ, тавары, вырабленыя ў Беларусі, у Саюзнай дзяржаве ў праграмах імпартазамяшчэння прызнаюцца айчыннымі. На Каўроўскім заводзе заяўляюць, што лакалізацыя дае прадукцыі значную канкурэнтную перавагу. "Міні-пагрузчык таксама прыбавіў у магутнасці. Мінскія маторы шырока вядомы, спажывец упэўнены ў даступнасці сэрвісу і малых эксплуатацыйных расходах", - паведамілі ў прэс-службе КЭМЗ.

На нядаўняй Міжнароднай спецыялізаванай выстаўцы сельскагаспадарчай тэхнікі "АГРАСАЛОН-2020" у Маскве кіраўнікі мінскага і каўроўскага прадпрыемстваў дамовіліся аб фарсіраванні супрацоўніцтва. Арыенціровачныя пастаўкі рухавікоў Д-243S2-2778 у 2021 годзе складуць 400 штук. Паскорыцца і рэалізацыя праектаў з астатнімі пагрузчыкамі.

Каўроўскі электрамеханічны завод - высокатэхналагічнае шматпрофільнае прадпрыемства. Спецыялізуецца на выпуску электрычных і гідраўлічных сістэм і прыбораў, тэхнікі грамадзянскага прызначэння, у тым ліку міні-пагрузчыкаў, шматфункцыянальных франтальных пагрузчыкаў, экскаватараў-пагрузчыкаў, гідраўлічных пад'ёмнікаў, трактароў, металаапрацоўчага абсталявання.

Мінскі маторны завод - вытворца сучасных дызельных, газадызельных, газапоршневых рухавікоў. Спецыялізуецца на распрацоўцы, праектаванні і вырабе сучасных трох-, чатырох-, шасці- і васьміцыліндравых рухавікоў. На заводзе выпускаецца больш за 100 мадыфікацый рухавікоў у дыяпазоне магутнасцей ад 7 да 330 кВт, прызначаных для ўстаноўкі на сельскагаспадарчую, дарожна-будаўнічую і лесаўборачную тэхніку, аўтамабілі і аўтобусы, энергаўстаноўкі, кампрэсары і іншыя агрэгаты. Рухавікі ММЗ пастаўляюцца на канвееры 49 прадпрыемстваў у Беларусі, Расіі, краінах СНД і далёкага замежжа, прадукцыя прадаецца ў больш чым 40 краін Еўропы, Азіі, Афрыкі, Паўночнай і Лацінскай Амерыкі. Пры вытворчасці рухавікоў выкарыстоўваюцца камплектуючыя сусветна вядомых кампаній.

версія для друку

зрабіць стартавай

дабавіць у выбранае