Бізнес-навіны

МАЗ разам з "Пажснаб" адправілі партыю пажарнай тэхнікі ў Манголію

Фота МАЗ

8 чэрвеня, Мінск /Кар. БЕЛТА/. МАЗ сумесна з ТАА "Пажснаб" (Барысаў) адгрузілі першую партыю пажарнай і аварыйна-выратавальнай тэхнікі для Дзяржаўнага нацыянальнага агенцтва па надзвычайных сітуацыях Манголіі, паведамілі БЕЛТА ў прэс-службе ААТ "МАЗ" - кіруючая кампанія холдынга "БЕЛАЎТАМАЗ".

Кантракт заключаны на пастаўку больш як 70 адзінак спецыяльнай тэхнікі - гэта пажарныя аўтацыстэрны рознай ёмістасці, аўталесвіцы, аўтамабілі пеннага і паветрана-пеннага тушэння. У партыю таксама ўвойдуць парашковыя і камбінаваныя аўтамабілі, штабныя аўтамабілі, мабільныя пункты кіравання і нават мабільны шпіталь са станцыяй дэзапрацоўкі. Акрамя таго, мангольскія выратавальныя службы атрымаюць вахтавыя аўтобусы вытворчасці Мінскага аўтамабільнага завода для дастаўкі свайго персаналу да месцаў працы. "Тэхніка мае палепшаныя характарыстыкі, спецыяльна дапрацаванымі з улікам кліматычных і геаграфічных асаблівасцей гэтага рэгіёна", - падкрэслілі ў прэс-службе.

Уся спецыяльная аўтатэхніка вырабляецца на базе шасі МАЗ. "У Мінскага аўтазавода багаты вопыт па стварэнні адаптаваных і спецыяльна сканструяваных надзейных шасі для работы ў надзвычайных сітуацыях. Пастаўляемая сучасная пажарная і аварыйна-выратавальная тэхніка - гэта вынік сумеснай работы МНС Беларусі, тэхнічных спецыялістаў ААТ "МАЗ" - кіруючая кампанія холдынга "БЕЛАЎТАМАЗ" і ТАА "Пажснаб", - адзначылі на прадпрыемстве. Уся тэхніка прайшла выпрабаванні ў рэальных умовах ліквідацыі надзвычайных сітуацый і зарэкамендавала сябе з найлепшага боку.

Кампанія ТАА "Пажснаб" - вытворца спецыяльнай і пажарнай тэхнікі, карпаратыўны партнёр МАЗ. Прадпрыемства пастаўляе тэхніку на базе шасі МАЗ у многія краіны СНД і далёкага замежжа.

Мінскі аўтамабільны завод - адно з найбуйнейшых  беларускіх машынабудаўнічых прадпрыемстваў, якое спецыялізуецца на выпуску велікагрузных аўтамабіляў, спецтэхнікі, аўтобусаў, тралейбусаў і прычапной тэхнікі. Гандлёвая марка МАЗ шырока вядома ў СНД і далёкім замежжы. Тэхніка адпавядае экалагічным стандартам Еўра-2, 3, 4, 5, 6. З канвеера завода сыходзяць седлавыя цягачы, бартавыя аўтамабілі, шасі пад устаноўку рознага спецабсталявання - усяго больш за 500 мадэлей і мадыфікацый.

версія для друку

зрабіць стартавай

дабавіць у выбранае