Бізнес-навіны

У ходзе візіту з 16 па 18 студзеня адбылася сустрэча першага намесніка прэм'ер-міністра Васіля Мацюшэўскага з кіраўніком адміністрацыі САР Ганконг Лян Чжэньінам. Бакі абмяняліся меркаваннямі адносна развіцця супрацоўніцтва ў інвестыцыйнай, фінансавай, гандлёва-эканамічнай і турыстычнай галінах.

Па выніках перагавораў падпісана пагадненне аб прадухіленні двайнога падаткаабкладання і папярэджанні ўхілення ад выплаты падаткаў на даходы і маёмасць паміж Беларуссю і САР Ганконг. Так, напрыклад, у адпаведнасці з пагадненнем стаўка па дывідэндах і працэнтах складзе 5 працэнтаў, стаўка роялці - ад 3 працэнтаў да 5 працэнтаў. На думку спецыялістаў, усё гэта створыць спрыяльныя ўмовы для супрацоўніцтва ў фінансавай сферы паміж Рэспублікай Беларусь і САР Ганконг.

Акрамя таго, дасягнута дамоўленасць аб узаемнай адмене віз, якая ўступіць у сілу пасля завяршэння ўнутрыдзяржаўных працэдур у Беларусі і ў КНР і дасць магчымасць істотна актывізаваць кантакты дзвюх краін на ўзроўні бізнесу і турызму.

Урадавая дэлегацыя прыняла ўдзел у інвестыцыйным форуме Belarus calling Hong Kong, прысвечаным супрацоўніцтву ў сферы інвестыцый, фінансаў і турызму паміж Беларуссю і САР Ганконг. У сваім выступленні Васіль Мацюшэўскі адзначыў, што інвестфорум даў магчымасць дзелавым колам Ганконга больш даведацца пра Беларусь, у перспектыве знайсці надзейных беларускіх партнёраў.

У форуме прынялі ўдзел буйнейшыя банкі і фінансавыя арганізацыі Кітая: ICBC, China Development Bank (HK), Export-Import Bank of China (HK), CICC, CITIC Capital, CITIC Bank, CTS, Hongkong stock exchange, Shenzhen stock exchange і іншыя. Усяго больш за 50 арганізацый кантынентальнага Кітая і Ганконга. Беларусь прадставілі Белаграпрамбанк, Банк развіцця, інвестыцыйны фонд "Зубр Капітал".