Бізнес-навіны

МАРГ разлічвае на прыняцце праграмы развіцця канкурэнцыі ў 2020 годзе

Андрэй Картун. Фота з архіва

26 лютага, Мінск /Юлія Неманкова - БЕЛТА/. Праграма развіцця канкурэнцыі ў Беларусі можа быць прынята ў 2020 годзе. Аб гэтым сёння паведаміў намеснік міністра антыманапольнага рэгулявання і гандлю Андрэй Картун на рэспубліканскім дзелавым форуме "Развіццё прадпрымальніцтва ў Беларусі: стратэгія і тактыка", перадае карэспандэнт БЕЛТА.

"Цяпер мы завершым узгадненне гэтай праграмы з дзяржорганамі, таксама будзе праходзіць грамадскае абмеркаванне. Зможам прыняць праграму ў гэтым годзе і рэалізаваць яе ў наступныя гады, каб стварыць умовы для доўгатэрміновага эканамічнага росту ў краіне", - сказаў Андрэй Картун.

У 2019 годзе заключана пагадненне з Міжнароднай фінансавай карпарацыяй па аказанні тэхнічнай дапамогі для напісання гэтай праграмы. "Асноўная мэта праграмы - развіццё канкурэнтнага асяроддзя, што будзе з'яўляцца дадатковым імпульсам для ўстойлівага развіцця эканомікі", - адзначыў намеснік міністра.

Падрыхтоўка дакумента прадугледжвала разлік індэкса развіцця канкурэнцыі ў Беларусі, гэта зроблена ўпершыню для нашай краіны. Яшчэ адзін напрамак - удасканаленне антыманапольнага заканадаўства. "З улікам міжнароднага вопыту быў зроблены ёмісты агляд заканадаўства і тых антыканкурэнтных актаў, якія перашкаджаюць развіццю бізнесу ў той ці іншай галіне", - растлумачыў Андрэй Картун. Праграма развіцця канкурэнцыі таксама прадугледжвае распрацоўку методыкі ацэнкі наступстваў прыняцця нарматыўна-прававых актаў, якія ўплываюць на ўмовы канкурэнцыі.

Як паведамлялася раней, праграма развіцця канкурэнцыі вызначыць прыярытэты і асноўныя напрамкі канкурэнтнай палітыкі краіны. Сярод іх - агульнае паляпшэнне канкурэнтнага асяроддзя за кошт скарачэння неабгрунтаваных бар'ераў і стварэнне механізмаў прадухілення залішняга рэгулявання, развіццё інфраструктуры і забеспячэнне яе даступнасці для ўдзельнікаў рынку.

версія для друку

зрабіць стартавай

дабавіць у выбранае