Бізнес-навіны

12 красавіка, Мінск /Кар. БЕЛТА/. Міністр замежных спраў Беларусі Уладзімір Макей сёння прыняў удзел у сустрэчы кіраўнікоў знешнепалітычных ведамстваў краін - удзельніц Вышаградскай групы (Венгрыя, Польшча, Славакія, Чэхія) і ініцыятывы ЕС "Усходняе партнёрства", якая адбылася ў Варшаве (Польшча). Аб гэтым БЕЛТА паведамілі ў прэс-службе МЗС.

Уладзімір Макей у сваім выступленні на пленарным пасяджэнні падкрэсліў неабходнасць больш цеснага ўзаемадзеяння краін "Усходняга партнёрства" (УП) і Вышаградскай групы ў транспартнай сферы, у тым ліку праз рэалізацыю ідэі сумяшчальнасці ў рэгіёне УП і правядзенне тэматычных мерапрыемстваў у гэтай галіне. Ён таксама звярнуў увагу на важнасць прыцягнення рэсурсаў міжнародных фінансавых інстытутаў для рэалізацыі перспектыўных інфраструктурных праектаў у рэгіёне.

Кіраўнікі дэлегацый абмеркавалі пытанні правядзення маючага адбыцца саміту "Усходняга партнёрства" ў лістападзе 2017 года ў Бруселі і сітуацыю ў рэгіёне.

У Варшаве Уладзімір Макей правёў шэраг двухбаковых сустрэч. У час перагавораў з еўрапейскім камісарам па пытаннях пашырэння і палітыкі добрасуседства Ёханесам Ханам абмеркаваны бягучы стан і перспектывы развіцця дыялогу па лініі Беларусь - ЕС. У цэнтры ўвагі сустрэч з намеснікам прэм'ер-міністра, міністрам замежных і еўрапейскіх спраў Харватыі Даворам Іва Штырам і міністрам замежных спраў Румыніі Тэадорам-Віярэлам Мелешкану знаходзіліся пытанні актывізацыі двухбаковага ўзаемадзеяння ў палітычнай і гандлёва-эканамічнай сферах, праблематыка адносін Беларусі і Еўрасаюза.

Кіраўнік беларускага знешнепалітычнага ведамства абмеркаваў з украінскім калегам Паўлам Клімкіным перспектывы развіцця двухбаковага палітычнага дыялогу, уключаючы падрыхтоўку перагавораў на вышэйшым узроўні. Разгледжаны і праблемныя моманты ўрэгулявання сітуацыі на ўсходзе Украіны.