Бізнес-навіны

Лукашэнка патрабуе ад вытворцаў мікраэлектронікі больш актыўна асвойваць расійскі рынак

17 сакавіка, Мінск /Кар. БЕЛТА/. Беларусь валодае ўсімі неабходнымі кампетэнцыямі, каб задаволіць патрэбнасці расійскага рынку пасля выхаду адтуль заходніх прадпрыемстваў. Аб гэтым Прэзідэнт Беларусі Аляксандр Лукашэнка заявіў на нарадзе аб перспектывах развіцця мікраэлектронікі, перадае карэспандэнт БЕЛТА.

У кааперацыі з айчыннай грамадзянскай і абароннай прамысловасцю ў Беларусі ствараюцца ўнікальныя прадукты, адзначыў Аляксандр Лукашэнка. Гэта беспілотнікі, робаты, станкі з лікавым праграмным кіраваннем, прынцыпова новыя віды ўзбраенняў, бытавая тэхніка сусветнага ўзроўню і многае іншае.

"Таму поле для работы і далейшага развіцця ў нас велізарнае. Па-першае, Расія. Наша краіна валодае ўсімі неабходнымі кампетэнцыямі, каб задаволіць патрэбнасці расійскага рынку пасля выхаду адтуль заходніх прадпрыемстваў. Гэта шанц. І мы яго павінны выкарыстаць. "Расатам", " Раскосмас", "Расэлектроніка". Аб'ёмы партнёрскіх пагадненняў павінны толькі расці", - паставіў задачу Прэзідэнт.

Паводле яго слоў, каласальны інтарэс да беларускай мікраэлектронікі праяўляюць і інвестары. "Мой нядаўні візіт у Зімбабвэ, Аб'яднаныя Арабскія Эміраты - прамое таго пацвярджэнне. З намі гатовы супрацоўнічаць і хочуць інвесціраваць у развіццё нашай прамысловасці, у тым ліку мікраэлектроннай. Прытым аб'ёмы грошай нават не абмяркоўваюцца, - заявіў кіраўнік дзяржавы. - Добрыя фінансавыя ўкладанні - гэта магчымасць карэннай мадэрнізацыі вытворчай базы, распрацоўкі новых тэхналогій і, як вынік, павелічэнне экспарту".

Аляксандр Лукашэнка падкрэсліў, што вучоныя, канструктары і практыкі павінны разумець, як і ў якім напрамку развівацца. "Калі ў нас такія людзі ёсць, то грошы для гэтага заўсёды знойдуцца. А такія людзі ёсць", - дадаў ён.

версія для друку

зрабіць стартавай

дабавіць у выбранае