Бізнес-навіны

Лукашэнка: інвесціраваць трэба перш за ўсё ў тыя сферы, дзе ў нас ужо ёсць кампетэнцыі

4 лістапада, Мінск /Кар. БЕЛТА/. Інвесціраваць трэба перш за ўсё ў тыя сферы, дзе ў Беларусі ўжо ёсць кампетэнцыі. Аб гэтым кіраўнік дзяржавы Аляксандр Лукашэнка заявіў 4 лістапада, узгадняючы назначэнне Ільі Ікана на пасаду старшыні Беларускага дзяржаўнага канцэрна па нафце і хіміі, перадае карэспандэнт БЕЛТА.

"Інвестыцыі, інвестыцыі - мы часта шукаем, куды ўкласці сродкі. Трэба ўкладваць у тыя школы, у тыя кампетэнцыі, якія мы сёння маем", - падкрэсліў Аляксандр Лукашэнка.

Ён прывёў у прыклад прадпрыемства ААТ "Полацк-Шкловалакно", якім кіраваў Ілья Ікан: "Я ўпэўнены, што вы лепш, чым хто-небудзь, ведаеце, якое яшчэ валакно трэба нам вырабіць, каб займацца імпартазамяшчэннем і добра выйсці на рынак".

"Калі мы перапрацоўваем нафту, мы ведаем, у які бок паглыбляцца, якія прадукты нам трэба атрымліваць. Мне далі даведку: малатанажная хімія - да 2030 года 40 новых відаў прадукцыі трэба вырабіць. Трэба ўкладваць у тое, што мы ўмеем рабіць. У нас вельмі шмат такіх напрамкаў і ў сферы грамадзянскай, і ў сферы ваеннай прамысловасці", - адзначыў Прэзідэнт.

Як паведамлялася, тэму інвестыцый кіраўнік дзяржавы закрануў і на абласных "Дажынках" у Мастах. Аляксандр Лукашэнка звярнуў увагу, што Гродзенская вобласць - адзіны ў краіне рэгіён, дзе выпускаюць сухія малочныя сумесі для дзяцей.

"Мы цяпер многія-многія праекты спрабуем ажыццявіць, "Адзін раён, адзін праект". Укладваем велізарныя грошы і часам хапаемся за праекты, дзе ў нас няма кампетэнцый. Мы хапаемся за тое, што мы не ўмеем рабіць. І не ведаем, удасца нам прадаць тое, што мы вырабляем, ці не. А малочныя сумесі, дзіцячае малако (я на поўдні Афрыкі быў, увесь свет аб'ехаў) - толькі дайце. Дзяцей у свеце няма чым карміць. Дык што ж мы выдумліваем? Давайце яшчэ адзін завод пабудуем і будзем вырабляць яшчэ лепшыя дзіцячыя сумесі", - прапанаваў Прэзідэнт.

Паводле яго слоў, гэта датычыцца многіх напрамкаў, напрыклад, дрэваапрацоўкі. "Па ўсім свеце вялікі попыт на піламатэрыялы, лесаматэрыялы. Тое, аб чым мы марылі. Я гаварыў: настане час - і гэта будзем прадаваць, ды яшчэ як будзем прадаваць", - адзначыў Аляксандр Лукашэнка.

версія для друку

зрабіць стартавай

дабавіць у выбранае