Бізнес-навіны

13 снежня, Мінск /Юлія Дылянок - БЕЛТА/. Прэзідэнт Беларусі Аляксандр Лукашэнка даручыў дэталёва прапрацаваць неабходнасць стварэння Нацыянальнага навукова-тэхналагічнага парка "БелБіяград". Аб гэтым кіраўнік дзяржавы заявіў сёння на II З'ездзе вучоных, перадае карэспандэнт БЕЛТА.

"Вы падумайце. Я ваша рашэнне (па стварэнні "БелБіяграда". - Заўвага БЕЛТА) гатовы падтрымаць, калі вы адкажаце мне на гэта пытанне: ці можна пры цяперашняй сістэме існаваць і развівацца? Калі не, будзем тады ў нейкі град выводзіць гэтыя напрамкі. Але калі вы маеце на ўвазе, што мы туды выведзем групу вучоных, напрамкаў толькі для таго, каб стварыць прэферэнцыі, то гэта неразумная, бесталковая прапанова, якая мною падтрымана не будзе", - сказаў Аляксандр Лукашэнка.

Прэзідэнт падкрэсліў, што шмат думаў на тэму неабходнасці стварэння "БелБіяграда". "Баюся, каб мы, прабачце мне за грубасць, не малпавалі. Недзе біяграды ствараюцца, і мы бяжым следам, ствараючы такія прадпрыемствы. Але калі паглядзець на сутнасць вашых прапаноў, то вы хочаце нейкія прадпрыемствы, групы вучоных, напрамкі выключыць з вузаўскай, галіновай, акадэмічнай навукі і перанесці ў нейкі град. Калі гэта трэба зрабіць, без гэтага не могуць развівацца такія напрамкі, давайце выключым і перанясём. Але калі мы можам, зыходзячы з таго, як цяпер развіваюцца гэтыя напрамкі, працаваць, даць вынік, не ламаючы нічога, то навошта ламаць і некуды пераносіць?" - задаў пытанне кіраўнік дзяржавы.

Аляксандр Лукашэнка адзначыў, што ў Беларусі такія напрамкі, як бія- і нанатэхналогіі, фармацыя і прыборабудаванне, і так знаходзяцца на даволі высокім узроўні развіцця. "Проста трэба працаваць", - лічыць Прэзідэнт.

"Падумайце, паважаныя вучоныя, ці трэба нам з існуючых сістэм вырываць гэтыя звёны і аб'ядноўваць нейкі град. Я выказаў сваё сумненне як прыклад. Мне прапануюць шмат такіх навацый, але гэтыя навацыі заключаюцца ў бальшавіцкай рэвалюцыйнасці - узяць, зламаць, на новым месцы пабудаваць новае. Хто палічыў, у што гэта абыдзецца? Падумайце", - рэзюмаваў кіраўнік дзяржавы.