Бізнес-навіны

Лукашэнка адобрыў праект пагаднення аб перавалцы беларускіх нафтапрадуктаў у марскіх партах Расіі

Фота з архiва

16 лютага, Мінск /Кар. БЕЛТА/. Прэзідэнт Беларусі Аляксандр Лукашэнка адобрыў праект міжурадавага пагаднення з Расіяй аб арганізацыі супрацоўніцтва ў галіне перавозкі і перавалкі нафтапрадуктаў з Беларусі, прызначаных для пастаўкі на экспарт у трэція краіны праз расійскія марскія парты, у якасці асновы для правядзення перагавораў. Адпаведны ўказ кіраўнік дзяржавы падпісаў 16 лютага. Аб гэтым БЕЛТА паведамілі ў прэс-службе беларускага лідара.

Аляксандр Лукашэнка ўпаўнаважыў Міністэрства транспарту і камунікацый на правядзенне перагавораў па праекце пагаднення і падпісанне дакумента пры дасягненні дамоўленасці ў межах адобранага праекта.

Раней паведамлялася аб пераносе падпісання адпаведнага пагаднення з 15 лютага на больш позні тэрмін у сувязі з завяршэннем унутрыдзяржаўных працэдур. Акрамя таго, пакуль не гатовы кантракты з расійскімі аператарамі тэрміналаў марскіх партоў і з чыгуначным аператарам, якія павінны падпісвацца разам з пагадненнем.

Праект пагаднення прадугледжвае перавалку беларускімі прадпрыемствамі больш як 9,8 млн т грузаў у расійскіх партах на Балтыцы ў 2021-2023 гадах. Размова ідзе аб такіх грузах, як мазут, бензін і масла. Пагадненне прадугледжвае заключэнне кантрактаў па прынцыпе take-or-pay. Калі грузаадпраўшчык забяспечвае перавалку ў аб'ёме меншым за ўзгоднены, марскі тэрмінал у любым выпадку атрымлівае плату за ўвесь узгоднены аб'ём.

Дзеянне пагаднення разлічана да канца 2023 года з магчымасцю аўтаматычнага прадаўжэння.

версія для друку

зрабіць стартавай

дабавіць у выбранае