Бізнес-навіны

Літва лідзіруе па закупках рапсавага алею праз БУТБ

Фота з архiва

24 мая, Мінск /Кар. БЕЛТА/. Літва лідзіруе па закупках рапсавага алею праз Беларускую ўніверсальную таварную біржу, паведаміў карэспандэнту БЕЛТА прэс-сакратар БУТБ Раман Яніў.

"Сума здзелак па імпарце рапсавага алею, ажыццёўленых літоўскімі кампаніямі на БУТБ, вырасла ў 12 разоў, да $15,2 млн. У выніку Літва стала буйнейшым пакупніком гэтай прадукцыі на біржавых таргах. У тройку асноўных рынкаў збыту беларускага рапсавага алею таксама ўвайшлі Швейцарыя з сумай здзелак $9,2 млн і Латвія ($2,2 млн). У першым выпадку тэмп росту да студзеня - красавіка мінулага года склаў 746 працэнтаў, а ў другім - 148 працэнтаў", - расказаў Раман Яніў.

Усяго па выніках чатырох месяцаў 2021 года на экспарт прададзена 24,7 тыс. т рапсавага алею на агульную суму $28,6 млн. Гэта ў чатыры разы больш за мінулагодні паказчык у натуральным выражэнні і ў шэсць разоў - у вартасным. Паводле слоў прэс-сакратара, рапсавы алей застаецца самай запатрабаванай таварнай пазіцыяй на экспартных біржавых таргах сельгаспрадукцыяй. На яго прыпадае 66 працэнтаў усяго экспарту тавараў сельскагаспадарчай групы.

"Геаграфія продажаў ахоплівае сем краін, тры з якіх прыйшлі на біржавую пляцоўку ў бягучым годзе. Гэта Кітай, Расія і Польшча. Што датычыцца перастановак у тройцы буйнейшых рынкаў збыту, то выхад Літвы на першае месца тлумачыцца пашырэннем кола літоўскіх пакупнікоў. Так, з 18 замежных кампаній, якія куплялі рапсавы алей на біржавой пляцоўцы, шэсць былі рэзідэнтамі Літвы. Яшчэ адзін станоўчы момант - рост фізічных аб'ёмаў здзелак, што сведчыць аб павышэнні даверу замежнага бізнесу да беларускай біржы", - адзначыў прэс-сакратар.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры. На БУТБ акрэдытаваны 5,1 тыс. замежных кампаній, у тым ліку 474 з Літвы, 166 з Эстоніі і дзевяць са Швейцарыі.

версія для друку

зрабіць стартавай

дабавіць у выбранае