Бізнес-навіны

Крутой: Беларусь можа паставіць да 15 працэнтаў тэхнікі пад праграму абнаўлення грамадскага транспарту ў РФ

Фота з архiва

21 жніўня, Масква /Эдуард Півавар - БЕЛТА/. Беларусь можа паставіць да 15 працэнтаў тэхнікі пад праграму абнаўлення грамадскага транспарту ў расійскіх рэгіёнах. Аб гэтым, адказваючы на пытанне карэспандэнта БЕЛТА, паведаміў пасол Беларусі ў Расіі Дзмітрый Крутой.
 
17 жніўня Прэзідэнт Расіі Уладзімір Пуцін правёў пасяджэнне Прэзідыума Дзяржсавета. На ім ён назваў абнаўленне парку грамадскага транспарту ў Расіі адной з важнейшых задач. Уладзімір Пуцін даручыў ураду сканцэнтравацца на тэме абнаўлення грамадскага транспарту ва ўсіх рэгіёнах і адшукаць для гэтага крыніцы і механізмы фінансавання.

"Так супала, што адразу пасля Дзяржсавета, на наступны дзень, мы правялі вельмі добрую сустрэчу з міністрам транспарту Расіі - ведамствам, якое адказвае за ўсю зводную работу: яно збірае ўсе патрэбнасці, акумулюе ў адным месцы, - расказаў Дзмітрый Крутой. - І мы адразу ж гэты момант прагаварылі: 60 тыс. аўтобусаў, 5 тыс. тралейбусаў і 4 тыс. трамваяў - задача Прэзідэнта Расіі абнавіць парк малых, сярэдніх гарадоў (акцэнт менавіта на іх) плюс, зразумела, гарады-мільённікі. Мінтрансам Расіі збіраюцца даныя аб патрэбнасцях і магчымасцях расійскіх вытворцаў, але міністр (кіраўнік Мінтранса Расіі Віталь Савельеў. - Заўвага БЕЛТА) нам паабяцаў, што беларусы таксама будуць удзельнічаць у гэтай праграме".

"Мы не з'яўляемся ні ў адным сегменце ні дамінантамі, ні канкурэнтамі. Прыкладна 10-15 працэнтаў ад гэтага аб'ёму, зыходзячы з нашых магчымасцей, мы на сённяшні дзень можам паставіць у рамках гэтай праграмы. Будзем абавязкова трымаць руку на пульсе і актыўна ў ёй удзельнічаць ", - падкрэсліў пасол.

Ён таксама дадаў, што па асобнай праграме плануюцца закупкі электробусаў для расійскіх гарадоў. "У любым выпадку мы будзем пашыраць і прапаноўваць рашэнні МАЗа і "Белкамунмаша" - для розных гарадоў яны розныя", - запэўніў Дзмітрый Крутой.

версія для друку

зрабіць стартавай

дабавіць у выбранае