Бізнес-навіны

Крутой: аграрны комплекс - адзін са стаўпоў устойлівасці беларускай эканомікі

16 лістапада, Клімавічы /Кар. БЕЛТА/. Аграрны комплекс - адзін са стаўпоў устойлівасці беларускай эканомікі. Аб гэтым заявіў кіраўнік Адміністрацыі Прэзідэнта Дзмітрый Крутой на абласным фестывалі-кірмашы працаўнікоў вёскі "Дажынкі" ў Клімавічах, перадае карэспандэнт БЕЛТА.

Прэзідэнт у сваёй прамове сёння так апісаў усю гісторыю развіцця сучаснай беларускай сельскай гаспадаркі пачынаючы з 90-х гадоў і  заканчваючы сённяшнім днём, што складана нешта дабавіць, адзначыў Дзмітрый Крутой. "Вы добра бачыце, якія працэсы і трансфармацыі адбываюцца ў сельскай гаспадарцы: ушчыльненне, механізацыя, аўтаматызацыя. Яны далі магчымасць дабіцца больш важкіх вынікаў, чым былі раней, - і па ўраджайнасці, і па прадукцыйнасці нашых асноўных культур", - дадаў ён.

Дзмітрый Крутой канстатаваў, што, нягледзячы на складанасць умоў гэтага года, беларускія аграрыі дасягнулі цудоўнага выніку і па збожжавых культурах, і па цукровых бураках. "Год яшчэ не закончыўся, але ўжо можна сказаць, што ў нас будуць рэкордныя паказчыкі ў малочнай жывёлагадоўлі. Аграрны комплекс забяспечыў у гэтым годзе $8,5 млрд экспарту. Гэта сапраўды адзін са стаўпоў устойлівасці", - прадоўжыў кіраўнік Адміністрацыі Прэзідэнта.

Ён звярнуў увагу: "З улікам перапрацоўкі, якая займае ў прамысловай вытворчасці каля 15 працэнтаў, агульны сумарны ўклад аграрнага сектара ў эканоміку нашай краіны дасягае 20 працэнтаў. Гэта без уліку сумежных галін, якіх таксама вельмі шмат, - машынабудаванне, нафтахімічны комплекс, вытворчасць угнаенняў, якія ўсе працуюць у прынцыпе на АПК. Таму гэта адна з ключавых галін нашай эканомікі".

Як падкрэсліў Дзмітрый Крутой, вялікая ўвага да сельскай гаспадаркі ў нашай краіне апраўдана. "Гэта ўстойлівасць, прычым не толькі ў агульных валавых паказчыках, але і ў прасторава-вытворчым размеркаванні прадукцыйных сіл нашай рэспублікі", - заявіў ён.

Дзмітрый Крутой дадаў, што не можа не радаваць, што ў галіну прыйшлі новыя тэхналогіі, у тым ліку дакладнае земляробства, а таксама новыя культуры. "Думаю, што ў гэтай галіны вельмі добрая перспектыва. І тыя лічбы, якія сёння агучаны ў выступленні нашага лідара, стануць праграмнымі", - рэзюмаваў кіраўнік Адміністрацыі Прэзідэнта.

версія для друку

зрабіць стартавай

дабавіць у выбранае