Бізнес-навіны

Кіраўнік МЗС Нікарагуа не выключае магчымасці ўдзелу Беларусі ў будаўніцтве Нікарагуанскага канала

19 мая, Мінск /Кар. БЕЛТА/. Міністр замежных спраў Нікарагуа Дэніс Манкада Каліндрэс не выключае магчымасці ўдзелу Беларусі ў будаўніцтве Нікарагуанскага канала, які можа стаць альтэрнатывай ужо існуючаму Панамскаму. Аб гэтым ён заявіў журналістам у Мінску, перадае карэспандэнт БЕЛТА.

Адказваючы на пытанне карэспандэнта БЕЛТА аб тэарэтычнай магчымасці ўкладу Беларусі ў рэалізацыю гэтага маштабнага праекта сваімі тэхналогіямі і тэхнікай, кіраўнік МЗС сказаў: "У ходзе нашай размовы (з Прэзідэнтам Беларусі Аляксандрам Лукашэнкам. - Заўвага БЕЛТА) таксама вялася гаворка і аб супрацоўніцтве ў сферы развіцця інфраструктурных праектаў. Хацеў бы адзначыць, што праект Нікарагуанскага канала працягвае жыць, ён не спыняўся. Таму, вядома ж, Беларусь таксама магла б прымаць удзел у рэалізацыі тых дамоўленасцей па рэалізацыі праектаў у сферы інфраструктуры. У тым ліку і таго, што вы згадалі".

У 2012 годзе Нацыянальны сход Нікарагуа адобрыў праект будаўніцтва "Вялікага трансакіянскага канала Нікарагуа", які ў выпадку завяршэння будаўніцтва злучыць воды Ціхага і Атлантычнага акіянаў. Плануецца, што новы міжакіянскі канал стане больш доўгай, шырокай і глыбокай альтэрнатывай Панамскаму каналу (адкрыты ў 1920 году) і сур'ёзна разгрузіць марскі трафік.

Дэніс Манкада Каліндрэс расказаў, што сустрэча з Прэзідэнтам Беларусі была плённай. Пацверджана ўзаемная падтрымка і салідарнасць паміж краінамі, абмеркаваны шэраг пытанняў па рэалізацыі праектаў супрацоўніцтва з магчымасцю падпісання канкрэтных кантрактаў па пастаўках тэхнікі, а таксама па іншых напрамках.

"Гаворка ішла аб тым, каб забяспечыць фінансавы складнік праектаў, якія мы плануем да рэалізацыі. У першую чаргу гэта сфера тэхналогій у сельскай гаспадарцы, пастаўкі тэхнікі для патрэб інфраструктурных праектаў, супрацоўніцтва ў адукацыі, узаемным гандлі. Гэта асноўныя тэмы, па якіх ёсць цікавасць да збліжэння нашых пазіцый, - заявіў кіраўнік МЗС Нікарагуа. - У дадзены момант размова ідзе аб канкрэтызацыі тых праектаў, якія мы плануем рэалізаваць паміж дзвюма краінамі. Асноўная мэта - стварыць рамачныя ўмовы, неабходную дагаворна-прававую базу, якая дасць магчымасць рэалізаваць гэтыя праекты і далей выходзіць на рэалізацыю іншых перспектыўных напрамкаў супрацоўніцтва".

Як паведамлялася БЕЛТА, Аляксандр Лукашэнка на сустрэчы прапанаваў значна паглыбіць двухбаковае супрацоўніцтва. "Для таго каб мець такія добрыя, цесныя адносіны, у нас сёння ёсць усё. І нават легендарны кіраўнік Нікарагуа, якога мы ўсе любім і паважаем у Беларусі. Я папрашу перадаць самыя цёплыя словы Даніэлю Артэгу ад імя беларускага народа, ад мяне асабіста. Мы ўражаны яго палітычнай дзейнасцю", - сказаў Прэзідэнт.

Ён запэўніў, што ўсё, у чым мае патрэбу Нікарагуа, у Беларусі ёсць, і нават з лішкам. "Нам трэба наладзіць нашы адносіны такім чынам, каб стварыць дагаворна-прававую базу пад нашы будучыя адносіны ў эканоміцы. Гэта справа часу. Думаю, калі мы зоймемся гэтай справай, то на працягу года мы не проста створым гэту нарматыўна-прававую базу, але і пачнём глыбокія эканамічныя адносіны паміж нашымі краінамі. Мы да гэтага гатовы", - упэўнены беларускі лідар.

Беларусь і Нікарагуа актыўна супрацоўнічаюць у рамках міжнародных арганізацый. Гандлёвыя адносіны пакуль маюць параўнальна невялікія аб'ёмы. Іх аснову складаюць пастаўкі прадукцыі з Беларусі. Дагаворна-прававая база знаходзіцца ў стадыі фарміравання. Вядзецца работа над узгадненнем праектаў шэрага ключавых пагадненняў, якія сфарміруюць аснову для развіцця гандлёва-эканамічнага супрацоўніцтва.

версія для друку

зрабіць стартавай

дабавіць у выбранае