Бізнес-навіны

Колькасць рэзідэнтаў парка "Вялікі камень" да 2025 года перавысіць 170

Фота з архiва

9 лістапада, Мінск /Кар. БЕЛТА/. Колькасць рэзідэнтаў парка "Вялікі камень" да 2025 года будзе не менш як 170, а агульная колькасць працуючых складзе амаль 5 тыс. чалавек. Аб гэтым паведаміў першы намеснік кіраўніка адміністрацыі індустрыяльнага парка "Вялікі камень" Пётр Якімаў у праекце "Па факце: рашэнні Першага" на YouTube-канале БЕЛТА.

Паводле яго слоў, у пачатку лістапада гэтага года новымі рэзідэнтамі парка сталі 6 высокатэхналагічных кампаній з Кітая і Беларусі. Яны будуць займацца выпускам сельскагаспадарчай тэхнікі, інавацыйнай друкаванай прадукцыі, дзейнасцю ў сферы біяінжынерных тэхналогій і захоўвання вялікіх баз даных. "Адзін з рэзідэнтаў - буйны беларускі лагістычны аператар, ён плануе будаўніцтва буйнога мультымадальнага тэрмінала", - растлумачыў Пётр Якімаў.

Ён падкрэсліў, што колькасць рэзідэнтаў парка пастаянна расце, іх ужо 99. "Да канца года чакаем, што пераадолеем лічбу 100 рэзідэнтаў. Заяўлены аб'ём інвестыцый цяпер $1,3 млрд. Гэта сума ўключае і інвестыцыйныя праекты, і развіццё інфраструктуры парка", - адзначыў першы намеснік кіраўніка адміністрацыі парка.

"Да 2025 года прагназуем, што колькасць нашых рэзідэнтаў будзе не менш як 170, агульная колькасць працуючых у парку складзе амаль 5 тыс. чалавек. Пад гэтыя грандыёзныя планы мы хочам і будзем развіваць інфраструктурныя праекты - інфраструктуру не толькі прамысловую, але і сацыяльную, каб парк з часам ператварыўся ў паўнацэнны горад-спадарожнік Мінска і, вядома, прамысловы кластар", - сказаў Пётр Якімаў.

Кітайска-беларускі індустрыяльны парк "Вялікі камень" - асаблівая эканамічная зона са спецыяльным прававым рэжымам, размешчаная за 25 км ад Мінска. Прыярытэтныя для парка напрамкі - машынабудаванне, электроніка і тэлекамунікацыі, біятэхналогіі, фармацэўтыка, новыя матэрыялы, лагістыка, электронная камерцыя, захоўванне і апрацоўка вялікіх аб'ёмаў даных.

Кіраўнік адміністрацыі "Вялікага каменя" Аляксандр Ярашэнка, уручаючы 3 лістапада пасведчанні аб рэгістрацыі чарговым рэзідэнтам, заявіў: "У бягучым годзе споўнілася 10 гадоў з падпісання кіраўніком дзяржавы першага ўказа па індустрыяльным парку. За гэты перыяд часу дасягнута шмат што: у нас паспяхова працуюць кампаніі з 15 краін і вырабляецца запатрабаваная прадукцыя. У "Вялікім камені" створаны лепшыя ўмовы для бізнесу і рэалізацыі сябе ў прафесіі. Гэта добрыя вынікі, але шмат што яшчэ наперадзе".

Праект створаны за кошт сродкаў мэтавага збору на вытворчасць нацыянальнага кантэнту.

версія для друку

зрабіць стартавай

дабавіць у выбранае