Бізнес-навіны

Клішэвіч: адносіны Беларусі і Кубы выходзяць на новы ўзровень развіцця

22 лістапада, Мінск /Кар. БЕЛТА/. Адносіны Беларусі і Кубы выходзяць на новы ўзровень развіцця, заявіў журналістам дэпутат Палаты прадстаўнікоў Сяргей Клішэвіч. Парламентарый прыняў удзел у сустрэчы старшыні Палаты прадстаўнікоў Уладзіміра Андрэйчанкі з Надзвычайным і Паўнамоцным Паслом Кубы ў Беларусі Санцьяга Перэсам Бенітэсам, перадае карэспандэнт БЕЛТА.

"Адносіны з Кубай на гэтым гістарычным этапе ў нас выходзяць на новы ўзровень развіцця. Мы бачым, як актывізаваліся нашы кантакты па самых розных сферах, пачынаючы ад медыцыны і заканчваючы прамысловасцю, сельскай гаспадаркай і IT-сектарам. Вядома, гэтыя ўзаемаадносіны трэба падмацоўваць пэўнай палітычнай падтрымкай, яна ў нас таксама пастаянна ўзрастае, - сказаў Сяргей Клішэвіч. - Падтрымку на міжнародных пляцоўках і салідарнасць Беларусь пастаянна выказвае народу Кубы ў сувязі з пастаяннымі нападкамі з боку Злучаных Штатаў. І, зразумела, кубінскі народ ведае, што адбываецца ў Беларусі і падтрымлівае нашу дзяржаву, нашу ўнутраную і знешнюю палітыку фактычна па ўсіх пытаннях. Значыць, у нас няма на сённяшні дзень тых тэм, якія, скажам так, выклікалі б рознагалоссі ці нейкія спрэчкі, дыскусіі. Мы тут у гэтых пытаннях салідарныя".

Паводле слоў дэпутата, краінам важна захоўваць такі высокі ўзровень палітычных кантактаў. "У нас вельмі актыўна працуе група дружбы з парламентам Кубы. Мы перыядычна абмяркоўваем самыя розныя напрамкі: ад рэальнага сектара эканомікі да палітычных пытанняў, і прымаюцца адпаведныя рашэнні. І сённяшняя сустрэча са старшынёй нашага парламента - гэта яшчэ адзін крок да таго, каб умацаваць такія палітычныя кантакты, якія, зразумела, будуць з'яўляцца імпульсам развіцця ўсіх астатніх сфер нашага ўзаемадзеяння", - падкрэсліў парламентарый.

"Адзін з напрамкаў нашага супрацоўніцтва - медыцынская сфера, фармтэхналогіі. Мы ведаем, што Куба даволі сур'ёзна развіта ў гэтым напрамку, і тут сёння наладжана супрацоўніцтва з нашымі арганізацыямі, з Міністэрствам аховы здароўя Беларусі. Кубінская вакцына супраць COVID-19 прызнана адной з лепшых у свеце, і сёння ў беларусаў ёсць магчымасць прышчапляцца ў тым ліку і гэтай вакцынай. Мы на гэтым не спыняемся, прапрацоўваецца пытанне выпуску лекавых сродкаў у барацьбе з ракавымі захворваннямі. Мы ведаем, што на Кубе ёсць сур'ёзныя распрацоўкі, яны ў гэтым пытанні развіваюцца", - дапоўніў Сяргей Клішэвіч.

На сустрэчы абмеркавалі ўзаемадзеянне паміж заканадаўчымі органамі абедзвюх краін, у тым ліку па лініі груп дружбы, беларуска-кубінскае супрацоўніцтва ў гандлёва-эканамічнай і гуманітарнай галінах, а таксама маючы адбыцца візіт у Рэспубліку Беларусь старшыні Нацыянальнай асамблеі народнай улады Рэспублікі Куба Хуана Эстэбана Ласа Эрнандэса.

версія для друку

зрабіць стартавай

дабавіць у выбранае