Бізнес-навіны

Казахстан арганізуе сустрэчы з рэсурсатрымальнікамі па пастаўках нафты ў Беларусь

Фота з архiва

4 лютага, Мінск /Кар. БЕЛТА/. Міністэрства энергетыкі Казахстана арганізуе для беларускага боку сустрэчы з мясцовымі рэсурсатрымальнікамі з мэтай перагавораў аб магчымых пастаўках нафты ў Беларусь. Аб гэтым паведаміў сёння журналістам казахстанскі міністр энергетыкі Нурлан Нагаеў, інфармуе ТАСС.

"Наша пазіцыя - дыверсіфікацыя паставак, міністэрства займаецца арганізацыяй палітыкі (у гэтай сферы. - Заўвага ТАСС). На сённяшні дзень прапрацоўваецца пытанне падпісання пагаднення аб супрацоўніцтве ў галіне нафты і нафтапрадуктаў. Пасля падпісання гэтага пагаднення беларускі бок мае магчымасць набываць у нас нафту. Мы на сённяшні дзень як міністэрства арганізоўваем ім сустрэчы з рэсурсатрымальнікамі па іх просьбе", - сказаў ён.

Нурлан Нагаеў не стаў удакладняць, з якімі менавіта рэсурсатрымальнікамі вядуцца перагаворы. "Мы не займаемся пошукам пастаўшчыкоў - гэта камерцыйнае пытанне", - растлумачыў ён. Кіраўнік Мінэнерга Казахстана адзначыў, што пагадненне аб пастаўках нафты ў Беларусь знаходзіцца на ўзгадненні ў дзяржорганах.

Як паведамлялася, дэлегацыя канцэрна "Белнафтахім" на гэтым тыдні наведае Казахстан для правядзення прадметных перагавораў па пастаўках нафты. Такая дамоўленасць была дасягнута ў час сустрэчы прэм'ер-міністра Беларусі Сяргея Румаса з прэм'ер-міністрам Казахстана Аскарам Маміным у Алматы.

Прэзідэнт Беларусі Аляксандр Лукашэнка падпісаў указ, якім упаўнаважыў урад на правядзенне перагавораў з Казахстанам аб гандлёва-эканамічным супрацоўніцтве ў галіне паставак нафты і нафтапрадуктаў у Беларусь, а таксама па праекце пагаднення і яго падпісанне пры дасягненні дамоўленасці ў межах адобранага праекта. Раней Аляксандр Лукашэнка не раз згадваў Казахстан у ліку краін, адкуль ёсць патэнцыяльная магчымасць для арганізацыі паставак нафты ў Беларусь. Гэта пытанне таксама абмяркоўвалася ў кастрычніку мінулага года ў час афіцыйнага візіту кіраўніка беларускай дзяржавы ў Казахстан.

версія для друку

зрабіць стартавай

дабавіць у выбранае