Бізнес-навіны

Каранкевіч: другі энергаблок БелАЭС плануем увесці ў прамысловую эксплуатацыю да канца года

17 кастрычніка, Мінск /Кар. БЕЛТА/. Другі энергаблок БелАЭС плануецца ўвесці ў прамысловую эксплуатацыю да канца года. Аб гэтым заявіў журналістам міністр энергетыкі Віктар Каранкевіч на XXVII Беларускім энергетычным і экалагічным форуме Energy Expo, перадае карэспандэнт БЕЛТА.

На мінулым тыдні ў рамках этапа доследна-прамысловай эксплуатацыі другога энергаблока БелАЭС завяршылася комплекснае апрабаванне яго абсталявання - на працягу 15 сутак блок працаваў на намінальнай магутнасці. Галоўная задача гэтых работ - пацвярджэнне адпаведнасці тэхналагічных сістэм, асноўнага і дапаможнага абсталявання блока праектным характарыстыкам і патрабаванням бяспекі.

"Другі энергаблок станцыі цяпер працуе на намінальнай магутнасці. У рамках этапа доследна-прамысловай эксплуатацыі выканана больш за 440 выпрабаванняў на розных рэжымах работы блока. Для прыёмкі ў эксплуатацыю другога энергаблока работу пачалі прыёмачныя камісіі па напрамках, вядзецца работа над афармленнем неабходных дакументаў. Арганізавана работа ўрадавай прыёмачнай камісіі, яе ўзначальвае намеснік прэм'ер-міністра Пётр Пархомчык. Плануецца, што ў бягучым годзе другі энергаблок будзе здадзены ў эксплуатацыю", - расказаў Віктар Каранкевіч.

Ён падкрэсліў, што атамная станцыя ўжо ўносіць значны ўклад ва ўмацаванне энергетычнай бяспекі Беларусі. З моманту ўключэння ў аб'яднаную энергасістэму першага энергаблока (3 лістапада 2020 года) БелАЭС выпрацавала больш за 20 млрд кВт.гадз электраэнергіі, што дало магчымасць замясціць 5,3 млрд куб.м прыроднага газу. Зніжэнне валютнай нагрузкі на эканоміку склала больш за $650 млн.

Міністр таксама заявіў, што за гады свайго існавання Беларускі энергетычны і экалагічны форум Energy Expo стаў буйнейшай для паліўна-энергетычнага комплексу выставачнай і дзелавой пляцоўкай, якая садзейнічае шырокаму пашырэнню ў галіне найноўшых тэхналогій і паслуг, а таксама высокатэхналагічных праектаў, накіраваных на ўмацаванне энергетычнай бяспекі краіны. Традыцыйна форум аб'ядноўвае шырокае кола ўдзельнікаў: прадстаўнікоў органаў дзяржкіравання, буйнейшыя кампаніі ў сферы энергетыкі, прамысловасці, экалогіі, навуковыя арганізацыі. Яны не толькі прадставяць свае дасягненні, але і абмяркуюць ключавыя аспекты, якія вызначаюць будучае развіццё галіны.

Асаблівае месца ў парадку дня форуму займае атамная энергетыка. "Разам з далейшым асваеннем мірнага атама сёння перад намі стаіць задача па максімальным выкарыстанні патэнцыялу сумежных галін: прамысловасць і адытыўныя тэхналогіі, трэнажорабудаванне, лічбавізацыя, сістэмы накаплення энергіі для энергетыкі і электратранспарту", - падкрэсліў Віктар Каранкевіч. Ён выказаў упэўненасць, што дасягнутыя на форуме дзелавыя дамоўленасці і выпрацаваныя рэкамендацыі будуць садзейнічаць рэалізацыі гэтых важнейшых задач.

версія для друку

зрабіць стартавай

дабавіць у выбранае