Бізнес-навіны
Каля 300 заявак пададзена на Кітайска-беларускі маладзёжны конкурс інавацыйных праектаў
20 мая, Мінск /Кар. БЕЛТА/. Каля 300 заявак пададзена на II Кітайска-беларускі маладзёжны конкурс навукова-даследчых і інавацыйных праектаў, у тым ліку 195 з Беларусі. Аб гэтым расказаў сёння на адкрыцці конкурсу старшыня Дзяржаўнага камітэта па навуцы і тэхналогіях Аляксандр Шумілін, паведамілі карэспандэнту БЕЛТА ў прэс-службе ДКНТ.
Паводле яго слоў, найбольшая колькасць праектаў паступіла па тэхнічных дысцыплінах - 66 працэнтаў ад усіх заявак. На другім месцы гуманітарныя навукі, далей - медыцына і фармацыя. "У Беларусі і Кітаі вялікае значэнне ўдзяляецца развіццю маладзёжнага прадпрымальніцтва і інавацыйнага бізнесу. Менавіта гэтыя сектары найбольш мабільныя і гібкія. Колькасць заявак, пададзеных у бягучым годзе, пацвярджае запатрабаванасць мерапрыемства сярод таленавітай моладзі. Можна з упэўненасцю сказаць, што правядзенне такога конкурсу - доўгатэрміновая інвестыцыя ў развіццё беларуска-кітайскіх адносін", - падкрэсліў Аляксандр Шумілін.
Ён таксама адзначыў, што супрацоўніцтва з Кітаем развіваецца дынамічна і па шырокім спектры напрамкаў. Расце колькасць і маштаб сумесных навукова-тэхнічных праектаў. "За апошнія 5 гадоў колькасць беларуска-кітайскіх праектаў павялічылася больш як на 50 працэнтаў. Нашы вучоныя пры падтрымцы Дзяржаўнага камітэта па навуцы і тэхналогіях і Міністэрства па навуцы і тэхналогіях Кітая паспяхова рэалізуюць праекты ў галіне мікраэлектронікі, аптычных і лазерных тэхналогій, біятэхналогій і новых матэрыялаў", - сказаў старшыня ДКНТ.
Сярод значных стратэгічных праектаў - адкрыццё Кітайска-беларускага інавацыйнага цэнтра камерцыялізацыі навукова-тэхнічных дасягненняў і Кітайска-беларускага інавацыйнага цэнтра прамысловых тэхналогій у індустрыяльным парку "Вялікі камень". Прадаўжаецца работа па развіцці Беларуска-кітайскага тэхнапарка ў горадзе Чанчуні. У сумесны тэхнапарк прыняты тры першыя рэзідэнты: Кітайска-беларускі цэнтр даследаванняў і распрацовак прэцызійнага медыцынскага абсталявання тэхнапарка БНТУ "Палітэхнік" і Беларуска-кітайскага тэхнапарка ў горадзе Чанчуні; Беларуска-кітайскі цэнтр па сумеснай распрацоўцы і прымяненні вуглярод-вугляродных кампазіцыйных матэрыялаў паміж ААТ "СветлагорскХімвалакно" і кампаніяй "Цзілінь Ленькэ"; Беларуска-кітайскі цэнтр па распрацоўцы функцыянальных ягадных культур паміж Цэнтральным батанічным садам НАН, ТАА "Палескія журавіны" і Паўночна-ўсходнім інстытутам геаграфіі і экалогіі сельскай гаспадаркі Кітайскай акадэміі навук.
"Для падтрымкі ўзрастаючай дынамікі двухбаковага ўзаемадзеяння мы павінны сканцэнтравацца на паляпшэнні ўмоў для ўзаемавыгаднага супрацоўніцтва, пашырэнні і паглыбленні кантактаў, у тым ліку сярод моладзі. У бягучым годзе Дзяржаўны камітэт па навуцы і тэхналогіях сумесна з Міністэрствам па навуцы і тэхналогіях Кітая аб'явяць новы конкурс беларуска-кітайскіх навукова-тэхнічных праектаў на 2022-2023 гады. Я запрашаю маладых вучоных Беларусі і Кітая падаваць свае праекты на гэты конкурс, а лепшыя з іх мы падтрымаем фінансава", - дадаў Аляксандр Шумілін.
II Кітайска-беларускі маладзёжны конкурс навукова-даследчых і інавацыйных праектаў праходзіць у Мінску 20 і 21 мая. У ім удзельнічаюць студэнты, магістранты, аспіранты і маладыя вучоныя з прэзентацыямі сваіх праектаў у такіх намінацыях, як інфармацыйныя тэхналогіі, машынабудаванне і металургія, экалогія, сельская гаспадарка, медыцына, адукацыйныя тэхналогіі. Арганізатары конкурсу - пасольства КНР у Беларусі, Дзяржаўны камітэт па навуцы і тэхналогіях, Міністэрства адукацыі, Беларускі нацыянальны тэхнічны ўніверсітэт, Інстытут Канфуцыя па навуцы і тэхніцы БНТУ, навукова-тэхналагічны парк БНТУ "Палітэхнік".
версія для друку
зрабіць стартавай
дабавіць у выбранае