Бізнес-навіны
Кабякоў: Турцыя можа стаць для Беларусі ключавым плацдармам для дыверсіфікацыі экспарту
12 лістапада, Стамбул /Юлія Дылянок - БЕЛТА/. Турцыя можа стаць для Беларусі ключавым плацдармам для дыверсіфікацыі экспарту. Аб гэтым заявіў сёння прэм'ер-міністр Андрэй Кабякоў, выступаючы на беларускім інвестыцыйным форуме ў Стамбуле, перадае карэспандэнт БЕЛТА.
"Беларусь пачала рэалізацыю новай для сябе экспартнай стратэгіі дыверсіфікацыі рынкаў. У сярэднетэрміновай перспектыве трэць беларускага экспарту плануецца накіраваць на новыя рынкі і рэгіёны. Ключавым месцам, новым плацдармам для нас, думаю, можа стаць Турцыя", - адзначыў Андрэй Кабякоў.
Паводле яго слоў, Беларусі ёсць што прапанаваць турэцкім партнёрам, краіна вырабляе шырокі пералік прадукцыі - ад інтэгральных мікрасхем да кар'ерных самазвалаў. "Мы - буйнейшы экспарцёр калійных угнаенняў, гэта больш як 18 працэнтаў сусветнага экспарту. Краіна - адзін з лідараў сусветнага экспарту IT-паслуг. Сёння беларуская прадукцыя выкарыстоўваецца на зямлі, у паветры і ў космасе", - канстатаваў кіраўнік беларускага ўрада.
Пры гэтым Андрэй Кабякоў падкрэсліў, што Стамбул цяпер з'яўляецца прывабным і хутка растучым фінансавым цэнтрам, які пачынае канкурыраваць з Лонданам, Цюрыхам і Франкфуртам. Паводле слоў прэм'ер-міністра гэта становіцца магчымым дзякуючы эфектыўнай эканамічнай палітыцы, праводзімай кіраўніцтвам Турцыі, стараннасці і ініцыятывам турэцкіх кампаній.
версія для друку
зрабіць стартавай
дабавіць у выбранае