Бізнес-навіны

24 мая, Мінск /Кар. БЕЛТА/. Міжнародная фінансавая карпарацыя (IFC) выдзеліць Беларусі да 2022 года на развіццё прыватнага сектара $100-120 млн, паведаміў кіраўнік прадстаўніцтва Сусветнага банка ў Беларусі Алекс Крэмер у праграме "Актуальнае інтэрв'ю" на тэлеканале "Беларусь 1", паведамляе БЕЛТА.

Міжнародная фінансавая карпарацыя - даччыная арганізацыя Сусветнага банка і член Групы Сусветнага банка - "плануе з гэтага моманту і да 2022 года выдзеліць прыкладна $100-120 млн на развіццё прыватнага сектара", сказаў Алекс Крэмер.

У верасні 2017 года Савет дырэктараў Сусветнага банка адобрыў пазыку ў памеры $60 млн для Банка развіцця Беларусі для рэалізацыі новага праекта "Пашырэнне доступу да фінансавання мікра-, малых і сярэдніх прадпрыемстваў у Рэспубліцы Беларусь". "Хутка пачнём рэалізацыю гэтай ініцыятывы", - дадаў кіраўнік прадстаўніцтва Сусветнага банка.

Як сведчаць вынікі сістэматычнай краінавай дыягностыкі Беларусі, амаль палова беларусаў працуе ў дзяржсектары. "Пры гэтым невялікі прыватны сектар - каля трэці эканомікі. Адна з першарадных задач - дапамагчы прыватнаму сектару вырасці ў аб'ёмах, а дзяржаўнаму - у прадукцыйнасці, - сказаў Алекс Крэмер. - Вельмі добра, што мы знаходзім у гэтым пытанні разуменне з беларускім урадам. І Прэзідэнт, і прэм'ер, і Савет Міністраў таксама хочуць павялічыць долю прыватнага бізнесу. Нашы імкненні супадаюць, і мы разам над гэтым працуем".

Сусветны банк акажа дапамогу Беларусі ў павышэнні якасці сацпаслуг, прадукцыйнасці працы, паляпшэнні інфраструктуры і інш.