Бізнес-навіны

Гусакоў аб імпартазамяшчэнні і развіцці беларускай навукі ва ўмовах санкцый

18 красавіка, Мінск /Кар. БЕЛТА/. Беларускія вучоныя не толькі гатовы адказаць на санкцыйны націск і прапанаваць свае рашэнні па імпартазамяшчэнні, але прама працуюць ужо ў гэтым напрамку. Аб гэтым у эфіры тэлеканала "Беларусь 1" расказаў старшыня Прэзідыума Нацыянальнай акадэміі навук Уладзімір Гусакоў, паведамляе БЕЛТА.

"Мы даўно працуем па імпартазамяшчэнні, не толькі ў сувязі з санкцыямі. Зусім нядаўна мы правялі інвентарызацыю нашых распрацовак, склалі вялікі пералік, накіравалі яго ў Савет Міністраў, Міністэрства прамысловасці для выкарыстання. Гэта наша асноўная дзейнасць, каб нашы распрацоўкі выкарыстоўваліся ва ўсіх галінах народнай гаспадаркі і на прадпрыемствах", - адзначыў Уладзімір Гусакоў. Ён прывёў прыклад: сёння беларускія вучоныя працуюць актыўна ў плане праграмнага забеспячэння, мікраэлектронікі, робататэхнікі, машынабудавання, аграрных тэхналогій і інш. "Гэта ўсё імпартазамяшчэнне. І эканоміка без навукі не можа развівацца паспяхова і ісці па інавацыйным шляху развіцця", - дадаў старшыня Прэзідыума Нацыянальнай акадэміі навук.

"У нас цесныя сувязі з Расійскай акадэміяй навук, з шэрагам інстытутаў, у нас сумесныя праекты і распрацоўкі, планы. Мы цяпер завяршаем распрацоўку праграмы фундаментальных даследаванняў з Курчатаўскім інстытутам. Спадзяёмся, што ў нас тут будзе філіял гэтага інстытута. Для гэтага ў нас падабраны будынак, вядзём перагаворы з кіраўніцтвам аб насычэнні новымі прыборамі, абсталяваннем, будуць сумесныя лабараторыі, будуць рыхтавацца кадры. І мы супрацоўнічаем з шэрагам іншых інстытутаў. Мы павінны выходзіць на канкрэтныя распрацоўкі для нашых эканомік",- падзяліўся Уладзімір Гусакоў.

Ён таксама адзначыў, што ўсё, што распрацоўваецца ў Нацыянальнай акадэміі навук, - укараняецца. "Цяпер навука вельмі запатрабавана на ўсіх прадпрыемствах. Два тыдні таму мы правялі сумеснае пасяджэнне з БЕЛАЗам, дзе падвялі вынікі і намецілі далейшыя перспектывы - дзе будзе роля вучоных, што дапрацоўваць, што ўдасканальваць. Цяпер намечаны такія пасяджэнні з шэрагам прадпрыемстваў. З МАЗам, трактарным заводам і іншымі. Без навукі і гэтыя прадпрыемствы не бачаць перспектыў развіцця", - рэзюмаваў Уладзімір Гусакоў.

версія для друку

зрабіць стартавай

дабавіць у выбранае