Бізнес-навіны

Гандлёвыя дамы, кірмашы, замена IKEA: што Беларусь прапануе Астраханскай вобласці

Фота з архiва

31 студзеня, Астрахань /Кар. БЕЛТА/. Пасол Беларусі ў Расіі Дзмітрый Крутой расказаў журналістам аб планах Беларусі і Астраханскай вобласці па развіцці тавараабароту, перадае карэспандэнт БЕЛТА.

"Наш Прэзідэнт даручыў адкрыць у Расіі магазіны, аналагічныя "Першаму нацыянальнаму гандлёваму дому". Астраханцам ужо гэта тэма прапанавана. Будзе гэта ў выглядзе асобнага гандлёвага дома або ў фармаце пашыранага кірмашу – паглядзім, будзем прапрацоўваць", - сказаў Дзмітрый Крутой.

Асаблівы інтарэс уяўляе беларуская прадукцыя дрэваапрацоўкі і легпрама. "Беларуская мэбля вельмі папулярна ў Астрахані, бачым рост паставак нашых ключавых вытворцаў. Але мы яшчэ прапануем канцэпцыю замены IKEA - "Гуд Лак". Акрамя мэблевай, плітнай прадукцыі, гэта і прадукцыя легпрама, Аршанскага льнокамбіната і іншых. Словам, гэта будзе беларуская IKEA ў Астрахані, два гандлёвыя цэнтры змагаюцца за тое, дзе гэта канцэпцыя будзе рэалізавана. Думаю, у бягучым годзе мы давядзём справу да канца", - адзначыў пасол.

Развіваюцца і пастаўкі з Астраханскай вобласці ў Беларусь. "У 2022 годзе ў структуры нашага тавараабароту ўзмацнілася пазіцыя хімікаў. Мы ў рамках імпартазамяшчэння сталі ў газахімічных, нафтахімічных вытворчасцей у Астраханскай вобласці купляць вельмі шмат серы, фенолаў, неапрацаванага цынку. Плюс з улікам праблем з Польшчай і іншымі краінамі Еўропы, якія пастаўлялі нам шмат плодаагародніннай прадукцыі, дамовіліся замяшчаць астраханскімі таварамі. Таматы, кавуны, дыні, рыба - у такі бок змянялася таварная структура. Сёння прэм'ер-міністр Беларусі дамовіўся з губернатарам рэгіёна, што ў Мінску будуць адкрыты спецыялізаваныя рыбныя магазіны астраханскіх вытворцаў. Будзем пазбаўляцца ад засілля пасрэднікаў, дыстрыб’ютараў з іх нацэнкамі, што вядуць да падаражэння прадукцыі", - праінфармаваў Дзмітрый Крутой.

версія для друку

зрабіць стартавай

дабавіць у выбранае