Бізнес-навіны

Галоўчанка заклікаў паскорыць работу над пагадненнем СНД аб тэхнічных бар'ерах ва ўзаемным гандлі

26 кастрычніка, Бішкек /Кар. БЕЛТА/. Прэм'ер-міністр Беларусі Раман Галоўчанка заклікаў паскорыць работу над пагадненнямі СНД аб тэхнічных бар'ерах ва ўзаемным гандлі і аб узаемным прызнанні акрэдытацыі органаў па ацэнцы адпаведнасці. Аб гэтым ён заявіў у час пасяджэння Савета кіраўнікоў урадаў СНД, перадае карэспандэнт БЕЛТА.

"У пазітыўным ключы адзначаю падпісанне шматбаковага пагаднення аб свабодным гандлі паслугамі і інвестыцыях, абнаўленне пераліку сумесных мер рэагавання на ўзнікаючыя праблемы, фарміраванне пераліку ўзаемных прэтэнзій у гандлі для іх далейшага ўстаранення. У нашых агульных інтарэсах забяспечыць у максімальна сціслы тэрмін уступленне ў сілу пагаднення аб паслугах і стварыць механізм маніторынгу функцыянавання гэтага дакумента. Прапануем таксама на ўзроўні Эканамічнага савета СНД грунтоўна разгледзець сітуацыю з распрацоўкай пагадненняў аб тэхнічных бар'ерах і аб узаемным прызнанні акрэдытацыі органаў па ацэнцы адпаведнасці, работа над якімі, на наш погляд, крыху зацягнулася", - сказаў Раман Галоўчанка.

Асаблівая ўвага ў рамках Садружнасці, на думку кіраўніка беларускага ўрада, патрэбна такім пытанням, як прадастаўленне нацыянальнага рэжыму пры ажыццяўленні дзяржаўных закупак адносна тавараў (работ, паслуг), садзейнічанне бесперашкоднаму абарачэнню насення сартоў і гібрыдаў сельскагаспадарчых культур у СНД, скарачэнне тэрмінаў і спрашчэнне працэдуры рэгістрацыі ўгнаенняў і пестыцыдаў. У гэтых мэтах праведзены ўжо немалы аб'ём работы.

"У цэлым можна з упэўненасцю гаварыць, што крытычна важна распаўсюджваць апрабаваныя ў фармаце ЕАЭС і даказаўшыя сваю эфектыўнасць рашэнні па ўсіх прыярытэтных напрамках на прасторы СНД", - рэзюмаваў Раман Галоўчанка.

версія для друку

зрабіць стартавай

дабавіць у выбранае