Бізнес-навіны

Галоўчанка: насуперак прагназістам з заходніх агенцтваў, беларуская эканоміка набрала нядрэнны тэмп

Фота з архiва

26 мая, Мінск /Кар. БЕЛТА/. Насуперак прагназістам з заходніх агенцтваў, беларуская эканоміка набрала нядрэнны тэмп. Аб гэтым заявіў прэм'ер-міністр Раман Галоўчанка, выступаючы сёння ў Авальнай зале Дома ўрада, перадае карэспандэнт БЕЛТА.

"Выконваючы рашэнні VI Усебеларускага народнага сходу, што адобрыў асноўныя палажэнні праграмы сацыяльна-эканамічнага развіцця краіны, урад пачаў іх рэалізацыю. Насуперак прагназістам з заходніх агенцтваў, якія прадракалі нам стагнацыю і спад, беларуская эканоміка набрала нядрэнны тэмп", - сказаў Раман Галоўчанка.

Ён прывёў асноўныя вынікі работы за чатыры месяцы. "Тэмп росту валавога ўнутранага прадукту склаў 102,5 працэнта да ўзроўню мінулага года, забяспечаны высокі рост аб'ёмаў прамысловай вытворчасці - 111 працэнтаў - пры мінімальным узроўні складскіх запасаў. Захавана ўстойлівасць у знешнім сектары, высокімі тэмпамі расце экспарт, забяспечана дадатнае сальда знешняга гандлю - больш за $800 млн. Гэта рэкордны паказчык за апошнія 10 гадоў. Значна палепшыліся фінансавыя вынікі работы прадпрыемстваў рэальнага сектара эканомікі. Чысты прыбытак перасягнуў Br3,3 млрд супраць чыстых страт у першым квартале мінулага года, а тыя арганізацыі, якія да гэтага часу захоўваюць стратнасць, агульная сума іх страт скарацілася больш як у 10 разоў", - адзначыў прэм'ер.

Выконваюцца ўсе сацыяльныя задачы дзяржавы. "За мінулы перыяд даходы насельніцтва ў рэальным выражэнні выраслі амаль на 3 працэнты, заработная плата - на 6 працэнтаў, пенсіі - на 2,7 працэнта. У бюджэтнай сферы выкананы асноўны крытэрый - гэта суадносіны зарплаты бюджэтнікаў і сярэдняй па краіне амаль 82 працэнты. Не дапушчана росту беспрацоўя. На фоне ажыўлення эканомікі расце занятасць. Амаль 13 тыс. чалавек працаўладкаваны на новыя рабочыя месцы", - падкрэсліў Раман Галоўчанка.

Аднак гэтыя вынікі вельмі не падабаюцца тым, хто, пацярпеўшы няўдачу ў спробах вулічнага бліцкрыгу, зрабіў стаўку на разбурэнне эканомікі нашай краіны і зніжэнне жыццёвага ўзроўню насельніцтва. "Нас метадычна спрабуюць на зуб і шукаюць слабыя месцы, не грэбуючы ніякімі метадамі. Першая спланаваная аперацыя па разбурэнні фінансавай сістэмы краіны, якая пачалася адразу пасля правалу вулічнай фазы, з трэскам правалілася. Мэта была простая - адрэзаўшы ад заходніх фінансавых рэсурсаў, адначасова праз шырокую сетку правакатараў і агентаў пасеяць чуткі аб хуткай абвальнай дэвальвацыі, замарозцы ўкладаў і іншых жахах. І тым самым паралізаваць фінансава-банкаўскую сістэму краіны. Гэты план не ўдаўся. Беларускі рубель не толькі стабільны, але і паступова ўмацоўваецца да сусветных валют. Прыток валюты ў банкі на працягу ўсяго перыяду гэтага года большы, чым адток. А золатавалютныя рэзервы толькі за красавік выраслі на $338 млн і на 1 мая склалі $7,3 млрд", - канстатаваў прэм'ер.

У сувязі з гэтым Захад вырашыў фарсіраваць санкцыйны ўдар. "На гэты раз мішэнню павінны стаць беларускія прадпрыемствы. Пры гэтым пад увагу не прымаецца, што ў канчатковым выніку гэта ўдарыць па нашых людзях, пра дабрабыт якіх яны нібыта клапоцяцца, - заявіў Раман Галоўчанка. - Але мы - суверэнная і самастойная дзяржава і можам абараніць сваіх грамадзян і свае прадпрыемствы. Урадам па даручэнні Прэзідэнта падрыхтаваны комплекс спецыяльных ахоўных мер у поўнай адпаведнасці з нашым заканадаўствам. Я не буду цяпер раскрываць увесь пералік. Але лічу, што ён будзе вельмі балючым для краін, якія занялі адкрыта варожую пазіцыю , - ад эмбарга на ўвоз тавараў да абмежавання транзіту. Але мы ўсё ж разлічваем на разважлівасць тых, хто спяшаецца прайсці кропку незвароту, і прапануем працвярэзіцца і падумаць яшчэ раз перад тым, як стаць на слізкую сцежку эканамічнай вайны, у якой не будзе пераможцаў".

Урад разумее тое, што санкцыі не будуць бязбольнымі. "Нам давядзецца і паскорана займацца дыверсіфікацыяй экспарту, і скарачаць расходы на непершачарговыя задачы, і вырашаць шэраг іншых пытанняў. Але суверэнітэт і незалежнасць ніколі не даваліся лёгка. За іх трэба змагацца і быць гатовым да цяжкасцей. Хачу нагадаць, што абсалютна ўсе сцэнарыі каляровых рэвалюцый апошняга дзесяцігоддзя, ад Туніса да Украіны, заканчваліся аднолькава - рэзкім зніжэннем узроўню жыцця ў параўнанні з дарэвалюцыйным перыядам, крывавым перадзелам уласнасці, спаўзаннем у пазыковую яму. І фактычным пераходам пад знешняе кіраванне. Такі вынік насільнай дэмакратызацыі, плаціць за які заўсёды вымушаны простыя людзі", - сказаў на заканчэнне прэм'ер.

версія для друку

зрабіць стартавай

дабавіць у выбранае