Бізнес-навіны

Галоўчанка: Беларусі і Казахстану трэба рухацца далей у галіне прамкааперацыі

28 кастрычніка, Мінск /Кар. БЕЛТА/. Беларусі і Казахстану трэба рухацца далей у галіне прамкааперацыі. Аб гэтым заявіў прэм'ер-міністр Беларусі Раман Галоўчанка ў час рабочай сустрэчы ў Астане з прэм'ер-міністрам Казахстана Аліханам Смаілавым, паведамляе карэспандэнт БЕЛТА.

"У нас у гэтым годзе назіраецца нядрэнная дынаміка. Тавараабарот павялічыўся, прычым характэрна, што гэта рух у двухбаковым напрамку: расце як беларускі экспарт у Казахстан, так і наадварот. Гэту добрую дынаміку трэба падтрымліваць і развіваць, у першую чаргу за кошт кааперацыйных праектаў у прамысловасці. Ужо цяпер паспяхова рэалізуюцца сем. Гэта і трактарная тэхніка, і камбайны, і аўтамабілі, і сельскагаспадарчае абсталяванне розных класаў", - сказаў Раман Галоўчанка.

У рамках аднаго з самых значных праектаў па стварэнні вытворчасці трактароў у індустрыяльнай зоне ў Кастанаі завершана будаўніцтва цэха па вырабе ўніфікаваных кабін вытворчай магутнасцю да 10 тыс. адзінак у год. "На наш погляд, гэта вельмі сур'ёзная дабаўка ў прамысловы патэнцыял Казахстана. Вядома ж, на такой базе трэба рухацца далей. Бакі вывучаюць магчымасць арганізацыі вытворчасці не толькі элементаў і вузлоў трактарнай тэхнікі, але і станочнага парку, рухавікоў да трактарнай тэхнікі, дызель-генератарных, помпавых установак, аптычнай прадукцыі", - адзначыў прэм'ер-міністр.

Прадаўжаецца прапрацоўка стварэння вытворчасці ветэрынарных прэпаратаў у Казахстане як для задавальнення патрэбнасцей унутранага рынку, так і для перспектыўнага экспарту ў трэція краіны. "Пакуль ідзе вывучэнне пытання стварэння такога сумеснага прадпрыемства, мы не чакаем, і беларускія вытворцы ветпрэпаратаў запусцілі продажы праз сетку спецыяльных аптэк. Але думаем, што менавіта сумесны праект дасць нам дадатковыя магчымасці, у тым ліку для экспарту", - падкрэсліў кіраўнік беларускага ўрада.-0-

версія для друку

зрабіць стартавай

дабавіць у выбранае