Бізнес-навіны

Фрэдэрык Шава: Зімбабвэ можа стаць буйным хабам па пастаўцы беларускай тэхнікі ў Паўднёвай Афрыцы

28 сакавіка, Мінск /Кар. БЕЛТА/. Зімбабвэ можа стаць буйным хабам у Паўднёвай Афрыцы па гандлі беларускай прадукцыяй. Аб гэтым, адказваючы на пытанні журналістаў, заявіў міністр замежных спраў і міжнароднага гандлю Зімбабвэ Фрэдэрык Шава пасля сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

Міністра спыталі аб тым, як ідзе работа і якія перспектывы таго, каб Зімбабвэ стала своеасаблівым хабам, уваходным пунктам для гандлю Беларусі з краінамі Паўднёвай Афрыкі. Гэта пытанне абмяркоўвалася лідарамі дзвюх краін у час візіту Прэзідэнта Беларусі. І Прэзідэнт Эмерсан Мнангагва паабяцаў сваё асабістае садзейнічанне, напрыклад, у развіцці супрацоўніцтва з Мазамбікам.

"Гэта была ініцыятыва Зімбабвэ, каб патэнцыял Беларусі, яе тэхналагічныя магчымасці былі прадстаўлены ў Зімбабвэ. Што датычыцца вытворчасці, мы можам вырабляць пэўную прадукцыю ў Зімбабвэ, выкарыстоўваючы беларускія тэхналогіі. Бясспрэчна, мы можам разам вырабляць новую прадукцыю, якая будзе выкарыстоўвацца як у Зімбабвэ, так і ў суседніх краінах, - сказаў Фрэдэрык Шава. - Калі мы рушым наперад і будзем паспяховымі ў гэтай справе, Зімбабвэ на самай справе зможа стаць хабам для нашага рэгіёна па пастаўках прадукцыі сумеснай вытворчасці".

Міністр падкрэсліў, што паміж Зімбабвэ і Беларуссю склаліся цудоўныя адносіны, дзякуючы чаму абодва бакі развіваюць супрацоўніцтва ў розных сферах і вывучаюць новыя магчымасці для ўзаемадзеяння. "Вельмі інтэнсіўна развіваецца супрацоўніцтва ў галіне сельскай гаспадаркі. І Беларусь вельмі садзейнічае забеспячэнню харчовай бяспекі Зімбабвэ, пастаўляючы трактары і іншую сельскагаспадарчую тэхніку. Мы ў поўнай меры выкарыстоўваем гэту магчымасць. Спадзяёмся, што дзякуючы такім візітам, як гэты, мы зможам палепшыць, нарасціць нашу актыўнасць у сферы сельскай гаспадаркі", - сказаў ён.

Паводле яго слоў, за час візіту адбыліся вельмі плённыя перагаворы з міністрам замежных спраў Беларусі. Для дэлегацыі Зімбабвэ былі арганізаваны сустрэчы з іх беларускімі калегамі, якія працуюць у сферах сельскай гаспадаркі, грамадзянскай абароны, гандлю, прамысловай вытворчасці.

версія для друку

зрабіць стартавай

дабавіць у выбранае