Бізнес-навіны

8 лістапада, Мінск /Кар. БЕЛТА/. Беларусь прыме ўдзел у шматгаліновай выстаўцы Expo Pakistan, якая пройдзе ў Карачы з 9 па 12 лістапада, паведамілі БЕЛТА ў выставачным прадпрыемстве "Белінтэрэкспа" Беларускай гандлёва-прамысловай палаты.

На Expo Pakistan будзе арганізавана экспазіцыя беларускіх вытворцаў Made in Belarus. Сваю прадукцыю прадставяць ААТ "Мінскі аўтамабільны завод" - кіруючая кампанія холдынга "БЕЛАЎТАМАЗ", ААТ "Амкадор" - кіруючая кампанія холдынга", ААТ "Кіруючая кампанія холдынга "Бабруйскаграмаш".

Expo Pakistan - буйнейшая выстаўка Пакістана. У 2015 годзе ў ёй прынялі ўдзел 500 мясцовых кампаній і больш як 700 экспанентаў з 77 краін, у тым ліку з Аўстраліі, Бразіліі, В'етнама, Германіі, Індыі, Кітая, Малайзіі, Расіі, Саудаўскай Аравіі, ЗША, Рэспублікі Карэя, Японіі.

Рынак Пакістана з насельніцтвам амаль 200 млн чалавек сёння зацікаўлены практычна ва ўсіх таварах, якія вырабляюць беларускія прадпрыемствы: ад прадуктаў харчавання да дарожна-будаўнічай тэхнікі. Асаблівы інтарэс - да сельгасмашын. У аграпрамысловым комплексе Пакістана, які фарміруе чвэрць мясцовага ВУП, занята больш як 40 працэнтаў насельніцтва.

Цяпер аснову беларускага экспарту ў Пакістан складаюць трактары, грузавыя аўтамабілі, калійныя ўгнаенні, сінтэтычныя валокны, шыны, прадукты дзіцячага харчавання. Тавараабарот за мінулы год склаў $63,8 млн (тэмп росту 113 працэнтаў). У планах - дасягнуць $1 млрд.