Бізнес-навіны

Экспарт прадукцыі, супрацоўніцтва ў адукацыі. Мінсельгасхарч аб рабоце з рэгіёнамі Афрыкі

У час выстаўкі "Белагра-2023". Фота з архіва

27 чэрвеня, Мінск /Кар. БЕЛТА/. Аб развіцці супрацоўніцтва з афрыканскімі рэгіёнамі расказалі карэспандэнту БЕЛТА ў Міністэрстве сельскай гаспадаркі і харчавання.

"Разам з умацаваннем пазіцый на традыцыйных для нас рынках і павелічэннем долі беларускіх прадуктаў харчавання асвойваюцца і новыя рынкі. Афрыканскі рэгіён - перспектыўны і даволі значны напрамак. Акрамя таго, ужо дасягнуты пэўныя вынікі", - расказалі ў Мінсельгасхарчы.

Паводле даных статыстыкі, у студзені - красавіку гэтага года беларуская прадукцыя пастаўлялася ў такія краіны Афрыкі, як Гана, Егіпет, Кот-д'Івуар, Маўрытанія, Нігерыя, Сенегал і Уганда. Наменклатура экспартных паставак уключае сухую малочную прадукцыю, рогакапытную сыравіну, субпрадукты, ялавічыну, мяса птушкі, алкагольныя напіткі і іншыя прадукты. Пры гэтым з краін Афрыкі ў Беларусь імпартуюцца цытрусавыя, фрукты, какава, свежыя кветкі, агародніна, кава і іншыя найменні тавараў.

"Для развіцця гандлёва-эканамічнага супрацоўніцтва дэлегацыі з Зімбабвэ, Кеніі, Егіпта, Уганды і ПАР наведалі міжнародную выстаўку "Белагра-2023", якая ў гэтым годзе прайшла з 7 па 11 чэрвеня ў "Вялікім камені". Дэлегацыі наведалі стэнды беларускіх перапрацоўчых арганізацый, змаглі азнаёміцца з пералікам вырабляемай беларускай прадукцыі, прадэгуставалі прадстаўленыя ўзоры, а таксама абмеркавалі перспектыўныя галіны супрацоўніцтва ў сельскай гаспадарцы", - адзначылі ў ведамстве. Абмяркоўваўся не толькі ўзаемны гандаль, але і пытанні механізацыі, ірыгацыі, угнаенняў, супрацоўніцтва ў галіне адукацыі і навукі, у тым ліку навучанне студэнтаў з краін Афрыкі ў Беларусі.

У час візіту дэлегацыі Кеніі ў Беларусь паміж Міністэрствам сельскай гаспадаркі і харчавання Беларусі і Міністэрствам гандлю, прамысловасці і інвестыцый Кеніі падпісана камюніке, у якім адлюстраваны дамоўленасці па далейшым супрацоўніцтве ў галіне сельскай гаспадаркі.

Новым рынкам для Беларусі стала і Зімбабвэ. Па выніках двухбаковых візітаў абмяркоўваюцца перспектыўныя напрамкі ў сферы сельскай гаспадаркі дзвюх краін. Для пашырэння геаграфіі паставак прадаўжаецца работа па забеспячэнні доступу мяса-малочнай прадукцыі на перспектыўныя рынкі краін Афрыкі, прапрацоўваюцца магчымасці падпісання мемарандумаў аб супрацоўніцтве ў галіне сельскай гаспадаркі.

"Вядома, існуючая геапалітычная сітуацыя ўнесла пэўныя карэктывы і аказала ўплыў на рост кошту дастаўкі нашай прадукцыі на гэты кантынент. У той жа час прадпрыемствы АПК зацікаўлены ў далейшым пашырэнні геаграфіі экспартных паставак і развіцці ўзаемавыгадных эканамічных адносін з краінамі Афрыкі пры ўмове эканамічнай мэтазгоднасці і наяўнасці спрыяльнай цэнавай кан'юнктуры. Так, нашы прадпрыемствы прапрацоўваюць магчымасці пастаўкі альтэрнатыўнымі лагістычнымі маршрутамі", - рэзюмавалі ў міністэрстве.

версія для друку

зрабіць стартавай

дабавіць у выбранае