Бізнес-навіны

ЕАБР, ВЭБ.РФ і банкі развіцця Казахстана і Беларусі аб'яднаюць намаганні

Фота з архiва

4 снежня, Мінск /Кар. БЕЛТА/. Еўразійскі банк развіцця (ЕАБР), расійская дзяржкарпарацыя развіцця ВЭБ.РФ, Банк развіцця Казахстана і Банк развіцця Беларусі заключылі мемарандум аб супрацоўніцтве з мэтай развіцця інтэграцыі паміж краінамі Еўразійскага эканамічнага саюза (ЕАЭС). Аб гэтым паведамляецца на сайце ЕАБР.

Цырымонія падпісання адбылася на палях Першага Еўразійскага кангрэса, арганізаванага ЕАБР. У рамках дасягнутых дамоўленасцей бакі аб'яднаюць намаганні для развіцця інтэграцыі паміж краінамі ЕАЭС шляхам ажыццяўлення інвестыцыйнай дзейнасці, а таксама для дасягнення агульных мэт і рэалізацыі агульных ініцыятыў у галіне будучага супрацоўніцтва, якія ўяўляюць узаемны інтарэс.

"Падпісаны мемарандум - гэта не толькі прадаўжэнне паспяховага супрацоўніцтва з кожным з бакоў, але і новы этап узаемаадносін ключавых фінансавых інстытутаў нашых краін, накіраваны на развіццё і інтэграцыю краін ЕАЭС", - адзначыў старшыня праўлення ЕАБР Мікалай Падгузаў.

"З прычыны свойго асаблівага статусу інстытуты развіцця нацэлены ў сваёй дзейнасці на вырашэнне найбольш актуальных эканамічных задач. Падпісаны сёння мемарандум аб'яднае ўнікальныя кампетэнцыі і вопыт усіх інстытутаў развіцця ЕАЭС і стане магутным сінергетычным імпульсам для больш маштабнага міжрэгіянальнага фінансавага супрацоўніцтва. Упэўнены, што такое цеснае партнёрства ўжо ў бліжэйшай перспектыве ўвасобіцца ў рэалізацыю новых узаемавыгадных праектаў і ініцыятыў", - пракаменціраваў старшыня праўлення Банка развіцця Беларусі Андрэй Жышкевіч.

версія для друку

зрабіць стартавай

дабавіць у выбранае