Бізнес-навіны

Дзяржстандарт расказаў аб галоўных навацыях закона "Аб забеспячэнні адзінства вымярэнняў"

Дзмітрый Барташэвіч

18 мая, Мінск /Кар. БЕЛТА/. У законе "Аб забеспячэнні адзінства вымярэнняў" змешчаны шэраг навацый, але радыкальных змяненняў, якія стварылі б складанасці, не будзе. Аб гэтым паведаміў намеснік старшыні Дзяржаўнага камітэта па стандартызацыі (Дзяржстандарту) Дзмітрый Барташэвіч сёння ў час анлайн-канферэнцыі да Сусветнага дня метралогіі "Дакладнасць вымярэнняў - у інтарэсах эканомікі і грамадства" ў прэс-цэнтры БЕЛТА.

"Важна сказаць, што закон эвалюцыйны. Радыкальных змяненняў, якія стварылі б складанасці для юрыдычных асоб, індывідуальных прадпрымальнікаў, спажыўцоў, няма", - адзначыў Дзмітрый Барташэвіч.

Як і раней, сістэма будзе працаваць на базавых прынцыпах выкарыстання адзінак Міжнароднай сістэмы адзінак SI.

Разам з тым у новым законе змешчаны значна большы (амаль у два разы) аб'ём паняційнага апарату. Ён уключае тэрміны і азначэнні, звязаныя з Дагаворам аб ЕАЭС, а таксама дадатковыя тэрміны. "Гэта сведчыць аб тым, што сфера метралогіі развіваецца, з'яўляюцца новыя паняцці, і, каб яны аднолькава трактаваліся, іх неабходна замацоўваць на заканадаўчым узроўні", - растлумачыў намеснік старшыні Дзяржстандарту.

Каб забяспечыць паўнату метралагічнай інфраструктуры, у закон уключаны новыя артыкулы: "Функцыі нацыянальнага метралагічнага інстытута", "Стандартныя ўзоры", "Метралагічная прасочвальнасць", "Дзяржаўны інфармацыйны фонд па забеспячэнні адзінства вымярэнняў", "Параўнанне рэзультатаў вымярэнняў".

Новая рэдакцыя закона больш дакладна вызначае і размяжоўвае паўнамоцтвы дзяржаўнай метралагічнай службы, а таксама юрыдычных асоб (іх метралагічных службаў) і іншых суб'ектаў у тым, што датычыцца работ па забеспячэнні адзінства вымярэнняў у рэгулюемай і нерэгулюемай сферах.

Уводзіцца інстытут дзяржаўнай паверкі, які будзе ад асобы дзяржавы займацца дзейнасцю ў сферы заканадаўчай метралогіі.

Новая рэдакцыя закона ўводзіць некалькі элементаў добраахвотнага характару, напрыклад, правядзенне метралагічных аўдытаў, параўнання рэзультатаў вымярэнняў. "Чакаецца, што гэта будзе запатрабавана прамысловымі прадпрыемствамі, індывідуальнымі прадпрымальнікамі, іншымі суб'ектамі эканомікі і дапаможа ім палепшыць метралагічнае забеспячэнне вытворчай дзейнасці. Паколькі не заўсёды кампаніі, асабліва невялікія, маюць сродкі і магчымасці для арганізацыі ўласнай метралагічнай службы. Тады яны змогуць звярнуцца да спецыялістаў-метролагаў, якія трымаюць руку на пульсе і акажуць садзейнічанне ў арганізацыі гэтай работы", - растлумачыў Дзмітрый Барташэвіч.

У мэтах развіцця Дагавора аб ЕАЭС і з улікам вопыту вядучых еўрапейскіх краін новая рэдакцыя закона прадугледжвае стварэнне Дзяржаўнага фонду ў галіне забеспячэння адзінства вымярэнняў, што дасць магчымасць акумуліраваць усю юрыдычна важную для суб'ектаў эканомікі і дзяржорганаў інфармацыю. У прыватнасці, фонд будзе змяшчаць базу даных зацверджаных тыпаў сродкаў вымярэнняў і стандартных узораў, рэзультаты дзяржаўнай паверкі сродкаў вымярэнняў, звесткі аб атэставаных методыках вымярэнняў, нарматыўную прававую базу ў галіне забеспячэння адзінства вымярэнняў.

"У цэлым закон "Аб забеспячэнні адзінства вымярэнняў" закладвае аснову для далейшага развіцця метралогіі без перапісвання закона праз кароткі прамежак часу. Закладзеныя падыходы даюць магчымасць на працягу доўгага часу працаваць у адпаведнасці з гэтым законам", - рэзюмаваў Дзмітрый Барташэвіч.

Закон "Аб забеспячэнні адзінства вымярэнняў" уступіць у сілу 27 лістапада 2020 года.

Цяпер у мэтах яго развіцця распрацоўваецца каля 20 нарматыўных прававых актаў, якія развіваюць палажэнні закона і заменяць тэхнічныя кодэксы існуючай практыкі, што ўстанаўліваюць працэдуры метралагічных работ, распрацоўку і змест нацыянальных эталонаў, прымяненне адзінак велічынь. Чакаецца, што да лістапада 2020 года гэтыя акты будуць прыняты.

версія для друку

зрабіць стартавай

дабавіць у выбранае