Бізнес-навіны

"Думаю, што "Амкадор" выканае свае абяцанні. Прынамсі, вы ніколі не падводзілі. І калі вы па выніку года зробіце тое, што паабяцалі, выйдзеце на той узровень, вы самі гэта адчуеце, і адчуе прадпрыемства, - адзначыў кіраўнік дзяржавы. - Але, самае галоўнае, будзе закладзена аснова нармальнай стабільнай работы на будучы год і наступныя".

Як было даложана Прэзідэнту, у цэлым прадпрыемствы холдынга "Амкадор" і ў прыватнасці ЗАТ "Амкадор-Пінск" працуюць устойліва, вырабляюць канкурэнтаздольную прадукцыю і бачаць перспектывы развіцця. Разам з тым ёсць пэўныя цяжкасці, абумоўленыя знешнімі фактарамі, курсавымі розніцамі, неабходнасцю абслугоўваць крэдыты, узятыя пад стварэнне новых магутнасцей. Усё гэта вымывае пэўную долю абаротных сродкаў, якія вельмі неабходны для вытворчасці, асабліва з улікам тэндэнцыі, што намецілася, па росце попыту на адпаведную прадукцыю.

"Для таго, каб выйсці з гэтай сітуацыі, не так шмат і трэба - каля $35-40 млн, каб закруціць вытворчасць і выйсці на той узровень у канцы года, які вы плануеце. Паспрабуем вам дапамагчы. Думаю, мы знойдзем такую магчымасць. Але, вядома, патрэбна аддача. Толькі наперад, чаго б нам ні каштавала", - сказаў Аляксандр Лукашэнка.

Старшыня савета дырэктараў ААТ "Амкадор" - кіруючая кампанія холдынга Аляксандр Шакуцін далажыў кіраўніку дзяржавы аб развіцці як прадпрыемства ў Пінску, так і холдынга ў цэлым. У бліжэйшыя гады на пінскім заводзе аб'ём вытворчасці плануецца павялічыць у 4-5 разоў. Пры гэтым у цэлым перад усімі прадпрыемствамі холдынга стаіць задача максімальна выкарыстоўваць беларускія камплектуючыя, развіваць уласную іх вытворчасць. "Усе нашы машыны на 80 працэнтаў з беларускіх камплектуючых, і 60 працэнтаў - уласных", - адзначыў Аляксандр Шакуцін. Холдынг выбраў для сябе канцэпцыю стварэння гамы машын для патрэб той ці іншай галіны. Адпаведныя лінейкі тэхнікі ўжо створаны, напрыклад, для лесанарыхтоўчай прамысловасці і здабычы торфу. Мільёны долараў штогод укладваюцца ў канструктарскія распрацоўкі.

"Чаму б не дапамагчы, калі ў яго ёсць кантакты пад гэту прадукцыю", - сказаў Аляксандр Лукашэнка ў час наведвання прадпрыемства. Пры гэтым ён падкрэсліў, што любыя сродкі павінны прадастаўляцца пад безумоўныя гарантыі вяртання.

Гаворачы аб рабоце на знешніх рынках, кіраўнік дзяржавы адзначыў, што беларускім прадпрыемствам не трэба там канкурыраваць і дзейнічаць раз'яднана. Прэзідэнт патрабуе ствараць за мяжой адзіныя пляцоўкі для продажу тэхнікі і прадастаўлення паслуг розных прадпрыемстваў. "Трэба падключаць усіх, каб гэта была пляцоўка Міністэрства прамысловасці", - сказаў ён.

Асобна Аляксандр Лукашэнка закрануў тэму занятасці, назваўшы найвышэйшай каштоўнасцю захаванне кадравага патэнцыялу, кампетэнтных спецыялістаў рознага ўзроўню. Гэта асабліва актуальна ў крызісны перыяд, калі, дзейнічаючы выключна на рыначных прынцыпах, можа ўзнікнуць спакуса пайсці па самым простым шляху, скараціўшы колькасць работнікаў. "Гэтага дапусціць нельга. Няхай гэты чалавек крыху менш атрымлівае, але крызіс калісьці заканчваецца", - падкрэсліў беларускі лідар.

Прэзідэнт адзначыў, што мінулы год з пункту гледжання эканомікі быў няпростым, і ў многім прычына таго - знешнія фактары. "Але, на жаль, свет глабалізаваны, узаемазалежны. Сёння немагчыма працаваць і спадзявацца толькі на сябе. Мы вельмі залежныя ад іншых, таму што ў нас адкрытая эканоміка", - сказаў Аляксандр Лукашэнка.

Кіраўнік дзяржавы азнаёміўся з выстаўкай узораў найноўшай і перспектыўнай тэхнікі, выпускаемай на прадпрыемствах холдынгаў "Амкадор" і "Салеа".

Названыя холдынгі з'яўляюцца буйнейшымі ў Беларусі вытворцамі спецыяльнай тэхнікі і аўтакампанентаў шырокага профілю. Прадпрыемствы холдынгаў вырабляюць 90 мадэлей машын і абсталявання, а таксама больш за 2 тыс. розных відаў вырабаў для гідраўлічных сістэм мабільнай тэхнікі і станочнага абсталявання. "Гэта вялікая вытворчасць. У зямлі свідравіну прабурыць і нешта здабыць таксама патрэбны вопыт і ўменне, але гэта значна прасцей, чым ствараць такое. Мы гэта навучыліся рабіць, у тым ліку "Амкадор", - адзначыў Прэзідэнт. Ён падкрэсліў, што цяпер прадпрыемствамі холдынга распрацоўваецца і выпускаецца самая сучасная, канкурэнтаздольная і запатрабаваная ў свеце прадукцыя.