Бізнес-навіны

Дэпутат: беларуска-кубінскія адносіны атрымліваюць новы імпульс для развіцця

Фота з архiва

29 верасня, Мінск /Кар. БЕЛТА/. Беларуска-кубінскія адносіны атрымліваюць новы імпульс для развіцця, заявіў журналістам член Пастаяннай камісіі па міжнародных справах Палаты прадстаўнікоў Сяргей Дзік, перадае карэспандэнт БЕЛТА.

"Візіт прэзідэнта Гандлёва-прамысловай палаты Кубы Антоніа Карыкартэ ў Беларусь дасць якасна новы імпульс развіццю беларуска-кубінскіх адносін. Паколькі нашы краіны знаходзяцца пад санкцыямі, а Куба пад санкцыямі ўжо не адзін дзясятак гадоў і яна выстаяла, наша задача - гэтак жа выстаяць, нягледзячы ні на што", - адзначыў Сяргей Дзік.

Апошнім часам намецілася інтэнсіўнае ўзаемадзеянне беларуска-кубінскіх спецыялістаў, прадпрыемстваў. "Цяпер рэалізуецца значны праект - 200 тыс. доз вакцыны ўжо зарэгістравана ў нашай краіне і літаральна праз тыдзень паступяць у Міністэрства аховы здароўя Беларусі для нашых грамадзян. Вельмі перспектыўнае ўзаемадзеянне спецыялістаў з Цэнтрам біямедыцынскай інжынерыі Кубы. А гэта распрацоўка новых лякарстваў. Як вядома, Куба - адзін з сусветных лідараў стварэння новых лякарстваў", - прадоўжыў дэпутат.

"Ужо ідзе ўзаемадзеянне з Паркам высокіх тэхналогій, кубінцы хочуць у сябе стварыць аналаг такога парка. Вялікія магчымасці ў падрыхтоўцы кубінскіх ІТ-спецыялістаў у Беларусі. Напрыклад, на базе БДУІР, іх стажыроўкі з выкарыстаннем дыстанцыйных тэхналогій. І, вядома, Беларусь славіцца сваім аўтамабіле- і трактарабудаваннем. Куба зацікаўлена ў пастаўках беларускіх трактароў. Больш таго, у стварэнні зборачных вытворчасцей на Кубе і пастаўках дэталей для рамонту больш як 70 тыс. нашых трактароў, якія цяпер знаходзяцца на Кубе. Гэта ўзаемадзеянне з МТЗ, "Бабруйскаграмашам". Гэта значыць мы маем вялікі зачын. І Куба, як і мы, хоча забяспечыць сваю харчовую бяспеку. Тут наш вопыт для іх неацэнны", - сказаў Сяргей Дзік.

У Палаце прадстаўнікоў праходзіць сустрэча кубінскай дэлегацыі з беларускімі дэпутатамі. Плануецца абмеркаванне гандлёва-эканамічных адносін дзвюх краін.

З 26 верасня ў Беларусі з рабочым візітам знаходзіцца дэлегацыя Гандлёва-прамысловай палаты Кубы на чале з яе прэзідэнтам Антоніа Карыкартэ. Ужо адбыўся бізнес-форум, сустрэчы з кіраўнікамі прадпрыемстваў, дасягнуты дамоўленасці аб супрацоўніцтве ў сферах машынабудавання, сельскай гаспадаркі, фармакалогіі і ІТ. Візіт прадоўжыцца да 30 верасня.

версія для друку

зрабіць стартавай

дабавіць у выбранае