Бізнес-навіны

Чарвякоў: кіраўнікі прампрадпрыемстваў заяўляюць аб росце сваіх пазітыўных чаканняў

Фота з архiва

13 красавіка, Мінск /Кар. БЕЛТА/. Кіраўнікі прампрадпрыемстваў заяўляюць аб росце сваіх пазітыўных чаканняў. Аб гэтым карэспандэнту БЕЛТА паведаміў міністр эканомікі Беларусі Аляксандр Чарвякоў.

"У сакавіку бягучага года НДЭІ Мінэканомікі апытаў кіраўнікоў прамысловых прадпрыемстваў розных форм уласнасці. Мы ахапілі амаль 80 працэнтаў прамвытворчасці. Агульны вынік: бізнес дэманструе рост пазітыўных чаканняў. Індэкс прамысловага аптымізму ўпершыню за 12 гадоў перайшоў у дадатную зону. Гэта значыць пазітыўных адказаў стала больш, чым негатыўных", - сказаў Аляксандр Чарвякоў.

Паводле яго слоў, гэты аптымізм абумоўлены тым, што ў сакавіку ўзрасла прамысловая вытворчасць. Аб павелічэнні выпуску паведамілі больш за 40 працэнтаў кіраўнікоў.

"Ажывіўся попыт на прадукцыю прадпрыемстваў, амаль трэць адказаў гэтаму пацвярджэнне. Ацэнкі фактычнага змянення экспартнага попыту таксама палепшыліся: чвэрць апытаных кіраўнікоў паведаміла аб яго росце, - расказаў міністр. - Загрузка вытворчых магутнасцей у сярэднім па прамысловасці склала ў сакавіку 65 працэнтаў. Пры гэтым кожнае чацвёртае прадпрыемства выкарыстоўвае больш за 80 працэнтаў сваіх магутнасцей".

Таксама ён адзначыў, што ў рэйтынгу негатыўных фактараў крыху знізілася значнасць эпідсітуацыі (з 31 працэнта да 27 працэнтаў).

Што датычыцца чаканняў апытаных кіраўнікоў прадпрыемстваў у бліжэйшым будучым, у цэлым яны аптымістычныя. "42 працэнты апытаных кіраўнікоў прагназуюць рост вытворчасці, толькі 7 працэнтаў - зніжэнне. Большасць рэспандэнтаў лічыць, што ў бліжэйшы месяц колькасць занятых на іх прадпрыемствах не знізіцца", - растлумачыў кіраўнік Мінэканомікі.

Аляксандр Чарвякоў дадаў: чакаецца павелічэнне попыту як на знешнім, так і на ўнутраным рынках. Аб гэтым заяўляюць 35 працэнтаў рэспандэнтаў. У 54 працэнтах прагназуецца захаванне існуючага ўзроўню.

"У цэлым чвэрць апытаных прагназуе ў бліжэйшы месяц паляпшэнне фінансавага стану іх прадпрыемстваў. Амаль 60 працэнтаў кіраўнікоў лічаць, што ён захаваецца на існуючым узроўні", - канстатаваў міністр.

версія для друку

зрабіць стартавай

дабавіць у выбранае