Бізнес-навіны

Чабатар: Беларусь нацэлена на пашырэнне гандлёва-эканамічнага супрацоўніцтва з Якуціяй

Фота з архiва

6 жніўня, Мінск /Кар. БЕЛТА/. Беларусь нацэлена на пашырэнне гандлёва-эканамічнага і інвестыцыйнага супрацоўніцтва з Рэспублікай Саха (Якуція). Аб гэтым заявіў міністр эканомікі Юрый Чабатар на пасяджэнні рабочай групы па беларуска-якуцкім супрацоўніцтве, якое прайшло сёння ў Якуцку, паведамілі БЕЛТА ў Міністэрстве эканомікі.

Юрый Чабатар падкрэсліў, што за 27 гадоў плённага ўзаемадзеяння сфарміраваліся трывалыя сувязі паміж Беларуссю і Якуціяй. Мінулы год стаў адным з самых паспяховых у гісторыі двухбаковага супрацоўніцтва: узаемны знешнегандлёвы абарот па выніках 2023-га падвоіўся. Разам з тым наменклатура продажаў пакуль параўнальна невялікая, і Беларусь гатова яе пашыраць.

"У сферы прамысловасці нашы прадпрыемствы зацікаўлены ў павелічэнні паставак пагрузчыкаў, трактароў, кар'ерных самазвалаў, - зрабіў акцэнт міністр эканомікі. - Мы бачым вялікі патэнцыял у развіцці супрацоўніцтва ў нафтахіміі, фармацэўтыцы, будаўніцтве, гатовы нарошчваць пастаўкі кабельнай прадукцыі і абсталявання для мадэрнізацыі электраэнергетычнай сістэмы рэгіёна".

Кіраўнік беларускага эканамічнага ведамства прапанаваў партнёрам з Якуціі актывізаваць узаемадзеянне ў галіне сельскай гаспадаркі - за кошт экспарту не толькі гатовай прадукцыі, але і тэхналогій яе вытворчасці і перапрацоўкі. Асаблівую значнасць у цяперашніх умовах, як заўважыў Юрый Чабатар, мае развіццё прамысловай кааперацыі і ўзмацненне інвестыцыйнага ўзаемадзеяння.

"Беларускія вытворцы зацікаўлены ў развіцці супрацоўніцтва з бізнесам Рэспублікі Саха. Дзейсныя механізмы стымулявання змяшчае наш абноўлены закон "Аб інвестыцыях", - сказаў міністр. - З красавіка сфарміраваны і рэалізуецца сумесны комплекс мерапрыемстваў па стымуляванні інвестыцыйнай актыўнасці ў Беларусі і Расіі. Гэта таксама спросціць і паскорыць рэалізацыю сумесных вытворчых ініцыятыў".

Удзельнікі мерапрыемства абмеркавалі выкананне дамоўленасцей, дасягнутых у ходзе папярэдняга пасяджэння рабочай групы, а таксама магчымасці пашырэння ўзаемадзеяння бакоў па розных напрамках - ад прамысловасці і АПК да спорту, турызму і гуманітарнай сферы. На пасяджэнні падпісана пагадненне аб супрацоўніцтве паміж Беларускім фондам фінансавай падтрымкі прадпрымальнікаў і Гандлёва-прамысловай палатай Рэспублікі Саха (Якуція).

версія для друку

зрабіць стартавай

дабавіць у выбранае