Бізнес-навіны

Чабатар: Беларусь гатова садзейнічаць развіццю ініцыятыў іранскіх інвестараў

Фота Мінэканомікі

27 сакавіка, Мінск /Кар. БЕЛТА/. Беларусь гатова садзейнічаць развіццю ініцыятыў іранскіх інвестараў. Аб гэтым заявіў міністр эканомікі Юрый Чабатар на сустрэчы з Надзвычайным і Паўнамоцным Паслом Ірана ў Рэспубліцы Беларусь Алірэзой Санеі, якая адбылася ў Мінэканомікі, паведамілі БЕЛТА ў прэс-службе ведамства.

Беларусь зацікаўлена ў пашырэнні ўзаемадзеяння. Паводле слоў міністра, новы імпульс адносінам дзвюх краін надалі дамоўленасці па выніках візіту ў Іран кіраўніка дзяржавы Аляксандра Лукашэнкі ў сакавіку 2023 года. А рэалізацыя мерапрыемстваў дарожнай карты ўсебаковага супрацоўніцтва паміж краінамі на 2023-2026 гады будзе садзейнічаць павышэнню эфектыўнасці дыялогу па шырокім спектры пытанняў.

Міністр эканомікі падкрэсліў, што Іран з'яўляецца адным з перспектыўных гандлёвых партнёраў Беларусі. "Тавараабарот паміж нашымі краінамі з 2021 года вырас больш як у тры разы. Экспарт тавараў павялічыўся больш як у шэсць разоў. Але ў нас яшчэ ёсць значны патэнцыял у сферах гандлёва-эканамічнага і інвестыцыйнага супрацоўніцтва. Беларусь гатова садзейнічаць развіццю ініцыятыў іранскіх інвестараў, якія дадуць магчымасць нам рэалізоўваць ўзаемавыгадныя інвестыцыйныя праекты", - адзначыў Юрый Чабатар.

Кіраўнік міністэрства таксама расказаў аб рабоце беларускай эканомікі ва ўмовах знешняга націску. Ён падкрэсліў, што ўдалося перабудавацца ў новых рэаліях і прыняць неабходныя меры па мінімізацыі наступстваў уведзеных абмежаванняў.

версія для друку

зрабіць стартавай

дабавіць у выбранае