Бізнес-навіны

БУТБ правяла анлайн-прэзентацыю для дзелавых колаў Башкортастана

Фота з архiва

25 лютага, Мінск /Кар. БЕЛТА/. Перавагі выкарыстання гандлёвых пляцовак Беларускай універсальнай таварнай біржы для ўмацавання дзелавых сувязей і павелічэння ўзаемнага тавараабароту Беларусі і Башкортастана былі прадстаўлены сёння на анлайн-канферэнцыі, прысвечанай пытанням двухбаковага гандлёва-эканамічнага супрацоўніцтва. Аб гэтым БЕЛТА паведамілі ў прэс-службе БУТБ.

Арганізатарам мерапрыемства выступіў Цэнтр падтрымкі экспарту Башкортастана.

Выступаючы перад удзельнікамі канферэнцыі, начальнік упраўлення знешнеэканамічнай дзейнасці БУТБ Аляксандр Башлій звярнуў асаблівую ўвагу на магчымасці, якія дае біржавая пляцоўка башкірскім кампаніям, зацікаўленым у развіцці гандлёвых адносін з беларускімі партнёрамі. У прыватнасці, біржавыя таргі адкрываюць доступ да большасці буйнейшых спажыўцоў прадукцыі, якая выпускаецца прадпрыемствамі Башкортастана, што дасць магчымасць аператыўна знайсці пакупніка і правесці здзелку на выгадных для абодвух бакоў умовах.

У той жа час БУТБ можа паслужыць эфектыўным інструментам закупак беларускіх тавараў, запатрабаваных у Башкортастане. Так, Беларусь традыцыйна пастаўляе ў Башкортастан машыны і абсталяванне, нафтахімічную і хімічную прадукцыю, тэкстыльныя вырабы, прадукты харчавання. Вытворцы ўсіх гэтых таварных пазіцый шырока прадстаўлены на БУТБ і гатовы супрацоўнічаць з расійскім бізнесам.

Гэта канферэнцыя стала адной з серыі анлайн-мерапрыемстваў, накіраваных на ўключэнне кампаній з розных рэгіёнаў Расіі ў біржавы гандаль з суб'ектамі гаспадарання Беларусі. У бягучым годзе прадстаўнікі БУТБ ужо прынялі ўдзел у аналагічных відэаканферэнцыях з Удмуртыяй, а таксама Смаленскай, Бранскай, Пскоўскай, Свярдлоўскай і Валгаградскай абласцямі.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае