Бізнес-навіны

БУТБ прапануе развіваць біржавы гандаль сельгаспрадукцыяй паміж Беларуссю і Карачаева-Чэркесіяй

Фота з архiва

9 лютага, Мінск /Кар. БЕЛТА/. Развіццё біржавога гандлю сельгаспрадукцыяй будзе садзейнічаць росту тавараабароту Беларусі і Карачаева-Чэркесіі. З прапановай аб арганізацыі ўзаемнага біржавога гандлю прадукцыяй сельскай гаспадаркі выступіў начальнік упраўлення знешнеэканамічнай дзейнасці Беларускай універсальнай таварнай біржы Аляксандр Башлій у ходзе пасяджэння рабочай групы па супрацоўніцтве паміж Беларуссю і гэтым суб'ектам РФ, якое адбылося ў рэжыме відэаканферэнцыі, паведамілі БЕЛТА ў прэс-службе БУТБ.

На думку Аляксандра Башлія, самым перспектыўным напрамкам узаемадзеяння Беларусі і Карачаева-Чэркесіі ў сферы біржавога гандлю з'яўляецца сегмент АПК. Пры гэтым нараўне з традыцыйнымі экспартна-імпартнымі аперацыямі БУТБ гатова прадаставіць у распараджэнне сельгасвытворцаў рэспублікі механізм транзітных здзелак, якім актыўна карыстаюцца кампаніі з іншых рэгіёнаў Расіі.

Калі гаварыць аб двухбаковым гандлі, то беларускім прадпрыемствам, якія займаюцца перапрацоўкай зерня, было б, безумоўна, цікава закупляць гэту прадукцыю ў Карачаева-Чэркесіі. Перш за ўсё гэта пшаніца, авёс, грэчка, кукуруза. Акрамя таго, у Беларусі добра развіта вытворчасць алею, таму насенне рапсу, сланечніку і іншых алейных культур таксама надзвычай запатрабавана на біржавых таргах", - адзначыў прадстаўнік БУТБ.

Разам з тым ён прапанаваў не абмяжоўвацца Беларуссю, а выходзіць праз гандлёвую пляцоўку БУТБ на больш ёмістыя рынкі краін ЕС і Азіі. "Напрыклад, акрэдытаваныя на біржы кітайскія кампаніі гатовы закупляць буйныя аб'ёмы мяса-малочнай прадукцыі, а еўрапейскія трэйдары літаральна змагаюцца за кожны лот беларускага алею. Гэта значыць, прыходзячы на біржавую пляцоўку, вы аўтаматычна атрымліваеце доступ да патэнцыяльных дзелавых партнёраў з 70 краін свету", - звярнуў увагу Аляксандр Башлій.

Па выніках пасяджэння рабочай групы падпісаны план мерапрыемстваў па развіцці супрацоўніцтва паміж Беларуссю і Карачаева-Чэркескай Рэспублікай РФ у гандлёва-эканамічнай, навукова-тэхнічнай і сацыяльна-культурнай сферах на 2022-2024 гады.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае