Бізнес-навіны

БУТБ прагназуе далейшы рост экспартных цэн на рапсавы алей

Фота з архiва

23 красавіка, Мінск /Кар. БЕЛТА/. Беларуская ўніверсальная таварная біржа прагназуе далейшы рост экспартных цэн на рапсавы алей, паведаміў карэспандэнту БЕЛТА прэс-сакратар БУТБ Раман Яніў.

З пачатку года цэны на нерафінаваны рапсавы алей, які пастаўляецца на экспарт праз Беларускую ўніверсальную таварную біржу, выраслі ў сярэднім на 28 працэнтаў. Гэта дазволіла беларускім экспарцёрам атрымаць дадатковую выручку больш за 220 тыс. еўра. Пры гэтым, на думку біржавых аналітыкаў, станоўчы цэнавы трэнд захаваецца і ў другім квартале бягучага года.

"Спрыяльная кан'юнктура на сусветных рынках аказвае станоўчы ўплыў на дынаміку продажаў прадукцыі перапрацоўкі алейных культур праз біржавую пляцоўку. Па выніках апошняй гандлёвай сесіі 20 красавіка экспартная біржавая каціроўка на рапсавы алей першага гатунку склала 1054,5 еўра за тону на ўмовах DAP. Для параўнання ў студзені такі ж алей на аналагічных умовах прадаваўся па 822 еўра за тону. З улікам высокага попыту на беларускі рапсавы алей у Еўропе, дзе ў сувязі з пандэміяй COVID-19 прыкметна знізіліся аб'ёмы вытворчасці, хутчэй за ўсё, цэны яшчэ не дасягнулі сваёй мяжы і ў другім квартале рост каціровак прадоўжыцца", - расказалі ў прэс-службе.

Акрамя сітуацыі на знешніх рынках, важную ролю ў цэнаўтварэнні адыгрывае і ўзровень канкурэнцыі ў ходзе біржавых таргоў. Як адзначылі на БУТБ, гэты паказчык за апошнія тры месяцы таксама значна павялічыўся.

"Калі раней у якасці пакупнікоў у таргах рапсавым алеем удзельнічалі пераважна кампаніі з Еўропы, то цяпер на біржавую пляцоўку прыйшлі новыя ігракі - у першую чаргу з Кітая. Канкурыруючы з еўрапейцамі, яны садзейнічаюць павышэнню экспартных цэн, што, у сваю чаргу, аказвае стымулюючае ўздзеянне на беларускіх вытворцаў. У выніку па аб'ёмах здзелак менавіта прадаўцы рапсавага алею сталі буйнейшымі экспарцёрамі сельгаспрадукцыі праз БУТБ", - заявілі ў прэс-службе біржы.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае