Бізнес-навіны

БУТБ мае намер павялічыць колькасць акрэдытаваных кампаній з Пакістана

Фота БУТБ

27 ліпеня, Мінск /Кар. БЕЛТА/. Беларуская ўніверсальная таварная біржа плануе павялічыць колькасць акрэдытаваных кампаній з Пакістана, паведамілі БЕЛТА ў прэс-службе біржы.

Па выніках сустрэчы міністра гандлю і інвестыцый пасольства Ісламскай Рэспублікі Пакістан у Маскве Шаўката Хаята Чымы з кіраўніцтвам БУТБ вызначаны прыярытэтныя напрамкі супрацоўніцтва, за кошт якіх плануецца актывізаваць біржавы гандаль Беларусі не толькі з Пакістанам, але і іншымі краінамі Паўднёвай Азіі. У прыватнасці, бакі маюць намер наладзіць узаемадзеянне ў сферы лагістыкі, што дасць магчымасць аптымізаваць транспартныя выдаткі і зрабіць прадукцыю, якая рэалізуецца беларускімі ўдзельнікамі біржавых таргоў, больш прывабнай па цане для пакістанскіх пакупнікоў.

"Мы падтрымліваем цесныя кантакты з транспартна-лагістычнымі кампаніямі, якія спецыялізуюцца на дастаўцы грузаў з Расіі ў Пакістан і назад. Як правіла, прымяняюцца мультымадальныя перавозкі з выкарыстаннем марскога, чыгуначнага і аўтатранспарту, аднак зусім нядаўна быў запушчаны сухапутны маршрут праз Афганістан. Думаю, беларускія экспарцёры, якія працуюць на біржавой пляцоўцы, таксама маглі б ім скарыстацца. Усё ж такі лагістычны складнік сур'ёзна ўплывае на канчатковую цану тавару, таму цалкам магчыма, што з'яўленне больш зручнага спосабу дастаўкі набытай на біржы прадукцыі не толькі надасць новы імпульс пакістанска-беларускаму біржавому гандлю, але і дапаможа прыцягнуць удзельнікаў таргоў з іншых паўднёваазіяцкіх дзяржаў", - адзначыў прадстаўнік пакістанскай дыпмісіі ў Маскве.

У ходзе перагавораў таксама абазначаны перспектыўныя тавары беларускай і пакістанскай вытворчасці, якімі мэтазгодна гандляваць праз электронную платформу БУТБ. Для Пакістана гэта імпарт піламатэрыялаў, сухога малака, цукру і алею, а для Беларусі - закупка рысу, збожжавых, пражы і каляровых металаў. Пры гэтым, паводле слоў намесніка старшыні праўлення БУТБ Ірыны Наркевіч, прымяненне біржавога механізма спросціць выхад пакістанскіх кампаній на беларускі рынак, забяспечыўшы прамы доступ да патэнцыяльных дзелавых партнёраў.

"Сутнасць біржы заключаецца ў стварэнні спрыяльных умоў для гандлю, што прадугледжвае шырокі асартымент тавараў, высокую канцэнтрацыю попыту і прапанавання, а таксама кантроль выканання здзелак. Усё гэта мы гатовы прадаставіць кожнай пакістанскай кампаніі, якая вырашыць весці бізнес на нашай пляцоўцы. Аднак для эфектыўнага функцыянавання біржавога механізма неабходна масавасць, патрэбны эфект маштабу, таму ў рамках нашага ўзаемадзеяння з пасольствам прапаную сканцэнтравацца на павелічэнні колькасці акрэдытаваных кампаній з Пакістана. Гэта мэта нумар адзін, дасягненне якой адпавядае ўзаемным інтарэсам нашых краін", - падкрэсліла Ірына Наркевіч.

версія для друку

зрабіць стартавай

дабавіць у выбранае