Бізнес-навіны

БУТБ акрэдытавала першага біржавога брокера ў Таджыкістане

Фота з архiва

11 верасня, Мінск /Кар. БЕЛТА/. Працэдуру акрэдытацыі на Беларускай універсальнай таварнай біржы ў якасці біржавога брокера-нерэзідэнта паспяхова прайшла першая кампанія з Таджыкістана, паведамілі БЕЛТА ў прэс-службе БУТБ.

Такім чынам, цяпер сетка замежных брокераў БУТБ налічвае 19 кампаній з 10 краін: Егіпта, Казахстана, Кітая, Латвіі, Манголіі, Польшчы, Расіі, Сінгапура, Таджыкістана і Узбекістана.

Асноўнай задачай новага брокера будзе прыцягненне на біржавую пляцоўку таджыкістанскіх імпарцёраў піламатэрыялаў і сельгаспрадукцыі і аказанне ім садзейнічання па заключэнні біржавых здзелак. Акрамя таго, таджыкістанскі брокер плануе пры неабходнасці кансультаваць сваіх кліентаў па пытаннях разлікаў, лагістыкі і кантролю якасці набываемых на біржы тавараў, а таксама садзейнічаць пашырэнню беларускай прадукцыі і біржавых паслуг на рынку Таджыкістана.

Развіццё біржавога гандлю паміж Беларуссю і краінамі Цэнтральнай Азіі характарызуецца высокай дадатнай дынамікай. Па выніках 8 месяцаў бягучага года агульная сума здзелак удзельнікаў таргоў з Казахстана, Кыргызстана, Таджыкістана, Туркменістана і Узбекістана склала $56 млн. Гэта амаль у 4 разы больш, чым за аналагічны перыяд мінулага года. Прычым рост біржавога тавараабароту назіраецца па ўсіх краінах рэгіёна.

У прыватнасці, аб'ём здзелак з Таджыкістанам павялічыўся ў вартасным выражэнні ў 6 разоў. У Беларусі таджыкістанскія кампаніі ў асноўным куплялі абразныя піламатэрыялы хвойных парод, а на экспарт рэалізоўвалі баваўняную пражу. Акрамя таго, у верасні былі заключаны першыя біржавыя кантракты на пастаўку ў Таджыкістан беларускага сухога малака і сыроваткі. "Разлічваем, што пры садзейнічанні таджыкістанскага брокера продажы айчынных малакапрадуктаў на гэты перспектыўны рынак істотна вырастуць", - адзначылі ў прэс-службе БУТБ.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае