Бізнес-навіны

БУТБ акрэдытавала першага брокера ў Манголіі

Фота з архiва

8 верасня, Мінск /Кар. БЕЛТА/. На Беларускай універсальнай таварнай біржы акрэдытаваны першы біржавы брокер з Манголіі - кампанія "Юнайтэд Мерэс Машынеры". Аб гэтым паведамілі БЕЛТА ў прэс-службе БУТБ.

Паводле інфармацыі БУТБ, "Юнайтэд Мерэс Машынеры" ўжо даволі даўно працуе на беларускім рынку і мае значны вопыт паставак сыравіны для металургічнай галіны. Акрамя таго, кампанія займалася рэалізацыяй кар'ерных самазвалаў і спецтэхнікі "БЕЛАЗ" горназдабыўным прадпрыемствам Манголіі. У статусе брокера "Юнайтэд Мерэс Машынеры" мае намер дыверсіфікаваць свой таварны партфель і па магчымасці задзейнічаць усе асноўныя групы тавараў, прадстаўленыя на біржавой пляцоўцы.

"Манголія - перспектыўны рынак для беларускіх прадпрыемстваў, прычым як з пункту гледжання закупак сыравіны і матэрыялаў, так і збыту гатовай прадукцыі. Выкарыстанне біржавой пляцоўкі ў якасці сувязнага звяна паміж беларускімі і мангольскімі суб'ектамі гаспадарання не толькі спросціць пошук дзелавых партнёраў, але і здыме асноўныя рызыкі, звязаныя з аплатай і пастаўкай тавараў. Пакуль што на біржы акрэдытавана толькі адна кампанія з Манголіі, але са з'яўленнем брокера ў гэтай краіне разлічваем, што сітуацыя зменіцца. Бо галоўная функцыя біржавых брокераў - прыцягваць на таргі новыя кампаніі і аказваць ім садзейнічанне ў заключэнні здзелак. Пачаць плануецца з тавараў павышанага попыту, такіх як чорныя металы і вугаль. Гэта калі мы гаворым пра імпарт у Беларусь. Што датычыцца экспарту, то цяпер прапрацоўваецца магчымасць паставак у Манголію прадукцыі нафтахімічнай галіны і АПК", - расказалі ў прэс-службе біржы.

У БУТБ адзначылі, што ў 2023 годзе назіраецца істотны рост біржавога тавараабароту з краінамі - суседзямі Манголіі. У прыватнасці, за студзень-жнівень сума здзелак, ажыццёўленых удзельнікамі таргоў з Расіі, павялічылася на 15 працэнтаў (у доларах), а з Кітая - у 2,2 раза.

Брокерская сетка біржы за мяжой пашырылася да сямі краін і цяпер уключае ў сябе Ізраіль, Кітай, Латвію, Манголію, Турцыю, Расію і Узбекістан.

версія для друку

зрабіць стартавай

дабавіць у выбранае