Бізнес-навіны

БУТБ і пасольства Кітая вызначылі прыярытэты ўзаемадзеяння ў гандлёва-эканамічнай сферы

Фота БУТБ

18 кастрычніка, Мінск /Кар. БЕЛТА/. Прыярытэтныя напрамкі супрацоўніцтва ў гандлёва-эканамічнай сферы вызначаны па выніках візіту ў цэнтральны офіс Беларускай універсальнай таварнай біржы дэлегацыі пасольства КНР у Беларусі, паведамілі БЕЛТА ў прэс-службе БУТБ.

У прыватнасці, адна з першарадных задач, якую трэба будзе сумесна вырашыць БУТБ і пасольству, - пашырэнне асартыменту беларускіх і кітайскіх тавараў, уключаных ва ўзаемны біржавы гандаль. Паводле слоў старшыні праўлення БУТБ Аляксандра Асмалоўскага, у структуры біржавога тавараабароту пераважае беларускі экспарт у Кітай, у той час як пастаўкі кітайскіх тавараў праз біржавую пляцоўку пакуль што ідуць недастаткова актыўна.

Сёння пераважная большасць кітайскіх кампаній удзельнічае ў біржавых таргах у якасці пакупнікоў. Праз біржу ў Кітай экспартуюцца беларускія піламатэрыялы, рапсавы алей, мясныя вырабы і сухое малако. Пры гэтым біржавы механізм становіцца ўсё больш запатрабаваным у кітайскага бізнесу, забяспечваючы высокую дадатную дынаміку па суме здзелак. Так, у параўнанні са студзенем - вераснем мінулага года рэзідэнты КНР амаль у два з паловай разы павялічылі аб'ёмы закупак на электроннай платформе БУТБ. "Тым не менш імпарт кітайскіх тавараў у Беларусь застаўся прыкладна на тым жа ўзроўні, а таварная наменклатура па-ранейшаму абмяжоўваецца толькі прадукцыяй чорнай металургіі. Улічваючы разнастайнасць тавараў, што выпускаюцца ў Кітаі, лічу, што поле для сумеснай работы вельмі шырокае", - падкрэсліў Аляксандр Асмалоўскі.

Для развіцця біржавога гандлю Беларусі і Кітая плануецца акцэнтаваць увагу на суб'ектах малога і сярэдняга прадпрымальніцтва, перш за ўсё вытворцах імпартазамяшчальных тавараў. З гэтай мэтай пры садзейнічанні пасольства КНР і Асацыяцыі кітайскіх кампаній у Беларусі разглядаецца магчымасць правядзення вочных і анлайн-семінараў для кітайскіх прадпрыемстваў, гатовых пастаўляць сваю прадукцыю на беларускі рынак.

"Мы бачым, якую важную ролю адыгрывае біржа ў эканоміцы Беларусі і ў тым ліку ў рэалізацыі яе экспартнага патэнцыялу. У гэтым кантэксце біржавая пляцоўка, безумоўна, уяўляе інтарэс для кітайскіх кампаній як надзейны і бяспечны спосаб вядзення бізнесу з беларускімі партнёрамі. А паколькі адной з ключавых функцый пасольства з'яўляецца развіццё гандлёва-эканамічных адносін паміж краінамі, мы гатовы аб'ядноўваць намаганні і разам з вамі развіваць гэты перспектыўны напрамак", - заявіла саветнік па гандлёва-эканамічных пытаннях пасольства КНР у Беларусі Ван Жуйцзюань.

Акрамя пытанняў біржавога гандлю, удзельнікі сустрэчы таксама абмеркавалі магчымасці паглыблення супрацоўніцтва паміж Міністэрствам антыманапольнага рэгулявання і гандлю Беларусі і Міністэрствам камерцыі КНР. Як адзначыла намеснік міністра антыманапольнага рэгулявання і гандлю Наталля Васілеўская, беларускае антыманапольнае ведамства падтрымлівае цесныя партнёрскія адносіны з калегамі з Кітая, аднак у святле яшчэ большага збліжэння эканомік дзвюх краін і істотнага павелічэння тавараабароту неабходна аналагічнымі тэмпамі актывізаваць і міжведамаснае ўзаемадзеянне.

"Мы рэгулярна сустракаемся з прадстаўнікамі Міністэрства камерцыі Кітая па відэа-канферэнц-сувязі, дзелімся вопытам, абмяркоўваем актуальныя праблемы. У нашых краін сапраўды шмат агульнага, у тым ліку ў сферы антыманапольнага рэгулявання. Таму нам хацелася б наладзіць больш актыўны абмен метадалагічнымі напрацоўкамі і паглыбіцца ў пытанні цэнаўтварэння, дзяржаўных закупак, стымулявання канкурэнцыі. Упэўнена, такое ўзаемадзеянне прынясе практычную карысць абодвум бакам", - падкрэсліла Наталля Васілеўская.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае