Бізнес-навіны

БУТБ і НАІП плануюць сумесна прыцягваць замежны бізнес у Беларусь

Фота з архiва

15 студзеня, Мінск /Кар. БЕЛТА/. Кіраўнікі Беларускай універсальнай таварнай біржы і Нацыянальнага агенцтва інвестыцый і прыватызацыі падчас сустрэчы дамовіліся аб развіцці супрацоўніцтва па прыцягненні ў Беларусь замежных кампаній, зацікаўленых працаваць на беларускім рынку праз біржавую электронную пляцоўку, паведамілі БЕЛТА ў прэс-службе БУТБ.

БУТБ і НАІП плануюць праводзіць сумесныя дзелавыя мерапрыемствы ў Беларусі і за мяжой для папулярызацыі інструментаў біржавога гандлю і ўмацавання гандлёвага і інвестыцыйнага патэнцыялу краіны. "Штогод мы прымаем сотні дэлегацый замежных дзелавых колаў, якія прадстаўляюць самыя розныя сферы бізнесу: ад дрэваапрацоўкі і будаўніцтва да лагістыкі і прамысловай вытворчасці. Усім гэтым кампаніям патрэбны, па-першае, надзейныя партнёры сярод беларускіх прадпрыемстваў, а па-другое, сыравіна, матэрыялы і тэхналагічнае абсталяванне для рэалізацыі інвестыцыйных праектаў. Біржа можа задаволіць абедзве гэтыя патрэбнасці. У сувязі з гэтым мы хацелі б уключыць наведванне вашай арганізацыі ў якасці абавязковага пункта ў праграмы дзелавых візітаў, запланаваных на бягучы год. На мой погляд, ад гэтага выйграюць усе зацікаўленыя бакі", - заявіў дырэктар НАІП Дзмітрый Красоўскі.

Старшыня праўлення БУТБ Аляксандр Асмалоўскі выказаў гатоўнасць аб'яднаць намаганні з НАІП і выступаць суарганізатарам бізнес-форумаў, канферэнцый, семінараў і іншых мерапрыемстваў, якія садзейнічаюць развіццю знешнеэканамічных адносін Беларусі. "Адна з важнейшых функцый біржы - забяспечваць умовы для максімальнай канцэнтрацыі попыту і прапанавання ў ходзе таргоў. Адпаведна, чым больш замежных кампаній даведаюцца пра магчымасці біржавой пляцоўкі, тым вышэйшая эфектыўнасць работы біржавога механізма. Таму мы гатовы не толькі ўдзельнічаць у арганізаваных агенцтвам мерапрыемствах, але і аказваць неабходную інфармацыйную і фінансавую падтрымку. Як вы правільна адзначылі, мы ставім сабе адны і тыя ж мэты, а разам зможам дасягнуць значна большага. Я ў гэтым не сумняваюся", - падкрэсліў ён.

ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з буйнейшых таварных бірж ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае