Бізнес-навіны

БУТБ і "Белмытнясэрвіс" пашыраюць супрацоўніцтва ў сферы трансгранічнага гандлю

Фота прэс-службы БУТБ

17 сакавіка, Мінск /Кар. БЕЛТА/. Беларуская ўніверсальная таварная біржа і лагістычны аператар РУП "Белмытнясэрвіс" маюць намер максімальна пашырыць супрацоўніцтва па ўсіх напрамках, каб аказваць беларускім прадпрыемствам поўны комплекс паслуг у сферы трансгранічнага гандлю. Аб гэтым заявіў першы намеснік гендырэктара РУП "Белмытнясэрвіс" Аляксандр Скачкоўскі на семінары па выкарыстанні біржавога механізма ў гандлёва-закупачнай дзейнасці, паведаміў карэспандэнту БЕЛТА прэс-сакратар БУТБ Раман Яніў.

"Як гандаль на біржы немагчымы без перамяшчэння тавару ад прадаўца да пакупніка, так і лагістыка страчвае ўсялякі сэнс пры адсутнасці здзелкі куплі-продажу. Адпаведна лічбавыя інструменты і сэрвісы, якія забяспечвае біржавая пляцоўка, варта разглядаць разам з транспартна-лагістычнымі паслугамі. Такім чынам, мы ствараем своеасаблівае "адно акно" для бізнесу, адзіную электронную платформу, з дапамогай якой беларускае прадпрыемства зможа ў рэжыме анлайн знайсці дзелавога партнёра, заключыць з ім кантракт і арганізаваць дастаўку тавару. Прычым гэта можа быць як здзелка паміж двума рэзідэнтамі Беларусі, так і знешнегандлёвая аперацыя з удзелам замежнага контрагента. Упэўнены, аб'яднанне рэсурсаў "Белмытнясэрвісу" і біржы адкрые новыя магчымасці для айчынных суб'ектаў гаспадарання і павысіць эфектыўнасць іх дзейнасці на ўнутраным рынку і за мяжой", - падкрэсліў Аляксандр Скачкоўскі.

РУП "Белмытнясэрвіс" удзельнічае ў біржавых таргах з 2016 года ў якасці трэйдара, а ў 2019 годзе прадпрыемства атрымала статус брокера БУТБ і аказвае садзейнічанне беларускім і замежным кампаніям па заключэнні здзелак на біржавой гандлёвай пляцоўцы. Адным з самых значных сумесных праектаў БУТБ і РУП "Белмытнясэрвіс" стала арганізацыя экспартных паставак беларускіх піламатэрыялаў у Кітай з прымяненнем кантэйнернага транспарту.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае