Бізнес-навіны
Будаўніцтва сацыяльных аб'ектаў у "Вялікім камені" плануецца пачаць у чэрвені
21 сакавіка, Мінск /Кар. БЕЛТА/. Кітай прадаставіць тэхніка-эканамічную дапамогу для будаўніцтва сацыяльнай інфраструктуры ў Кітайска-беларускім індустрыяльным парку "Вялікі камень", будаўніцтва аб'ектаў плануецца пачаць у чэрвені. Аб гэтым ішла размова на сустрэчы намесніка прэм'ер-міністра Беларусі Анатоля Калініна з генеральным прадстаўніком кітайскай кампаніі China Merchants Group у Цэнтральнай Азіі і краінах Балтыйскага рэгіёна, галоўным выканаўчым дырэктарам СЗАТ "Кампанія па развіцці індустрыяльнага парка" Ху Чжэнам, паведамілі БЕЛТА ў прэс-службе ўрада.
На сустрэчы бакі падвялі вынікі праведзенай работы па стварэнні індустрыяльнага парка "Вялікі камень", а таксама абмеркавалі планы і стратэгічныя задачы на 2017 год.
"З задавальненнем адзначу, што мы выканалі ўсе пастаўленыя Прэзідэнтам Беларусі задачы па развіцці індустрыяльнага парка, будаўніцтве інжынернай структуры. Але стаяць яшчэ вялікія задачы - прыцягненне інвестыцый і рэзідэнтаў у наш парк", - сказаў Анатоль Калінін. Пры гэтым ён адзначыў, што, па сутнасці, створана інфраструктура цэлага горада, куды можа прыйсці любы жадаючы інвестар.
У сваю чаргу Ху Чжэн праінфармаваў, што з кітайскім урадам дасягнута дамоўленасць аб прыцягненні тэхніка-эканамічнай дапамогі Кітая для будаўніцтва сацыяльных аб'ектаў у парку. Гэта паліклініка, жылы дом на 144 кватэры, цэнтр камерцыялізацыі інавацый і аб'екты грамадскага транспарту. Работы па ўзвядзенні збудаванняў плануецца пачаць у чэрвені бягучага года.
Бакі таксама заявілі аб узаемнай зацікаўленасці ў стварэнні сумеснага праектнага інстытута, які зможа распрацоўваць праектную дакументацыю для рэзідэнтаў парка. Дасягнуты дамоўленасці аб завяршэнні фармальных працэдур па стварэнні такога інстытута да канца красавіка 2017 года.
версія для друку
зрабіць стартавай
дабавіць у выбранае