Бізнес-навіны
Біржавы тавараабарот Беларусі з Кітаем за I квартал дасягнуў $7,5 млн
14 красавіка, Мінск /Кар. БЕЛТА/. Біржавы тавараабарот Беларусі з Кітаем за першы квартал 2021 года дасягнуў $7,5 млн. Аб гэтым паведаміў журналістам старшыня праўлення ААТ "Беларуская ўніверсальная таварная біржа" Аляксандр Асмалоўскі, перадае карэспандэнт БЕЛТА.
Сёння Надзвычайны і Паўнамоцны Пасол Кітайскай Народнай Рэспублікі ў Беларусі Се Сяаюн наведаў біржу, і старшыня праўлення БУТБ лічыць, што гэты візіт - знак таго, што кітайскі ўрад і кіраўнік дыпламатычнай місіі надаюць асаблівае значэнне біржавому гандлю. "У апошнія два гады ў нас вельмі актыўна развіваецца біржавы гандаль паміж Кітаем і Беларуссю. Рост на сесіях назіраем практычна па ўсіх таварных пазіцыях, якія выстаўляем на продаж на Кітай. БУТБ распрацавала шэраг інструментаў, што дапамагаюць кітайскім кампаніям проста, хутка і эфектыўна выйсці на беларускі рынак, і непасрэдна біржа сваімі механізмамі спрасціла пошук партнёраў на беларускім рынку, зрабіла куплю і продаж тавараў хуткімі", - адзначыў Аляксандр Асмалоўскі.
Праз БУТБ не толькі прадаюцца беларускія тавары ў Кітай, але і набываецца кітайская прадукцыя. Кітайскі бок купляе ў асноўным такія тавары, як піламатэрыялы, рапсавы алей, сухое малако. Цяпер плануецца ажыццяўляць здзелкі на біржавых таргах па куплі беларускага цукру. З Кітая айчынныя кампаніі пастаўляюць у Беларусь металапрадукцыю. "Кітайскія кампаніі ўсё больш і больш прыходзяць да нас, іх колькасць, як удзельнікаў біржавых таргоў, пастаянна павялічваецца, і мы назіраем рост як па колькасці ўдзельнікаў, так і па аб'ёмах гандлю. Калі ў 2019 годзе ў нас на біржавых таргах яшчэ не было ні адной кітайскай кампаніі, то сёння па выніках першага квартала 2021 года ўжо 40 кітайскіх кампаній, а таксама два кітайскія брокеры, якія працуюць у інтарэсах кітайскіх кампаній. Калі ж гаварыць пра вынікі нашага гандлю з Кітаем, то яны яшчэ пакуль не зусім уражваюць, але ўжо можна па дынаміцы бачыць, наколькі яны развіваюцца. Так, калі за 2020 год наш біржавы тавараабарот з Кітаем складаў $13,5 млн, то за першы квартал 2021 года ён дасягнуў $7,5 млн. Я прагназую, што па выніках года мы перасягнём вынік 2020 года", - падкрэсліў кіраўнік БУТБ.
Паводле яго інфармацыі, сёння пул нерэзідэнтаў біржы складаецца амаль з 5 тыс. кампаній з 63 краін свету, якія акрэдытаваны і працуюць праз біржавыя таргі. "На жаль, кітайскі рынак пачаў асвойвацца не так даўно. Традыцыйна першыя месцы ў нас па экспартных пазіцыях займаюць еўрапейскія краіны, 82 працэнты экспарту, які прадаецца праз біржавыя таргі, - гэта экспарт у краіны ЕС. Сённяшні візіт пасла Кітая - знакавы, гэта паказчык таго, што біржавыя таргі занялі пэўную ролю ў нашым узаемным гандлёвым абароце, Кітай зацікаўлены біржавымі таргамі, паколькі біржа дае магчымасць суб'ектам гаспадарання Кітая вельмі хутка знайсці партнёраў у Беларусі і эфектыўна заключыць здзелкі", - адзначыў Аляксандр Асмалоўскі.
Пасол Кітая ў Беларусі Се Сяаюн у сваю чаргу адзначыў, што ён спецыяльна вырашыў наведаць сёння менавіта БУТБ, паколькі супрацоўніцтва паміж Кітаем і Беларуссю развіваецца вельмі добра і плённа, нягледзячы на складаную эпідэміялагічную сітуацыю. "У гэтай галіне біржа адыгрывае вельмі актыўную ролю менавіта падчас пандэміі, паколькі здзелкі можна ажыццяўляць анлайн, незалежна ад эпідэміялагічнай сітуацыі ў свеце. БУТБ адыгрывае вельмі важную ролю для дыверсіфікацыі гандлю паміж Кітаем і Беларуссю", - падкрэсліў дыпламат.
версія для друку
зрабіць стартавай
дабавіць у выбранае