Бізнес-навіны

18 мая, Мінск /Кар. БЕЛТА/. На выстаўцы MILEX-2017 будуць прадстаўлены больш за 30 краін, паведаміў журналістам старшыня Дзяржаўнага ваенна-прамысловага камітэта Сяргей Гурулёў, перадае карэспандэнт БЕЛТА.

"Што датычыцца прадстаўніцтва, будуць больш за 30 краін, ад іх звыш 50 дэлегацый. Найбольш магутныя - з Расійскай Федэрацыі, Кітая", - сказаў Сяргей Гурулёў. Упершыню ў бягучым годзе ў выстаўцы прымуць удзел кампаніі з Германіі і Славакіі, будзе прадстаўлена Польшча.

Для прадпрыемстваў айчыннага абароннага сектара платформа MILEX - зручная пляцоўка для рэалізацыі перспектыўных праектаў, выхаду на новы тэхналагічны ўзровень. Экспанаваць прадукцыю плануюць амаль 80 беларускіх прадпрыемстваў і ўстаноў адукацыі. Навукова-тэхнічныя распрацоўкі прадставяць арганізацыі і навучальныя ўстановы Міністэрства абароны, Дзяржаўнага пагранічнага камітэта, МНС, а таксама Нацыянальнай акадэміі навук Беларусі.

Арганізацыі, якія ўваходзяць у сістэму Дзяржкамваенпрама, упершыню на выстаўцы прадставяць каля 90 узораў узбраення, ваеннай і спецыяльнай тэхнікі. Гэта і сродкі перамяшчэння, сродкі радыёлакацыі, радыёэлектроннай разведкі і барацьбы, сродкі паражэння.

Асабліва важна, паводле слоў Сяргея Гурулёва, што па многіх узорах і напрамках удалося выйсці на поўны цыкл - ад распрацоўкі і вытворчасці да рэалізацыі як на ўнутраным, так і на знешнім рынках.

Адказваючы на пытанне, як Беларусі ўдаецца быць у ліку рэгіянальных вытворцаў узбраенняў, старшыня Дзяржкамваенпрама адзначыў: "Мы не страцілі патэнцыял. Той патэнцыял Савецкага Саюза даў магчымасць падрыхтаваць новых людзей, цэлыя калектывы, якія маюць багаты вопыт папярэдніх пакаленняў, але самае галоўнае - жыва цікавяцца сусветным вопытам у галіне абароннай тэхнікі". Пры гэтым Беларусь вядома сваімі IT-тэхналогіямі, праграмным забеспячэннем, сістэмамі кіравання, радыёэлектронікі.

Афіцыйная цырымонія адкрыцця пройдзе 20 мая на тэрыторыі аэрадромнага комплексу аэрапорта Мінск-1, яна стане своеасаблівым пралогам выстаўкі MILEX-2017. Гледачы змогуць атрымаць асалоду ад яркага шоу на зямлі і ў паветры. Асноўнай пляцоўкай стане спартыўны комплекс "Мінск-Арэна". Паводле слоў Сяргея Гурулёва, MILEX - гэта значная ваенна-палітычная і эканамічная падзея ў жыцці краіны. Арганізатары прыклалі максімум намаганняў, каб прадэманстраваць развіццё абароннай прамысловасці ў Беларусі.