Бізнес-навіны

Больш за 100 навукова-тэхнічных распрацовак прадставіць Беларусь на Кітайскай выстаўцы імпарту

5 лістапада, Мінск /Кар. БЕЛТА/. Больш за 100 навукова-тэхнічных і інавацыйных распрацовак у сферы інфармацыйна-камунікацыйных тэхналогій (ІКТ), аховы здароўя, біятэхналогій, новых матэрыялаў, сельскай гаспадаркі прадставіць Дзяржаўны камітэт па навуцы і тэхналогіях Беларусі на Кітайскай міжнароднай выстаўцы імпарту ў віртуальным фармаце. Аб гэтым паведаміў на адкрыцці выстаўкі старшыня ДКНТ Аляксандр Шумілін, перадае карэспандэнт БЕЛТА.

Паводле яго слоў, на калектыўным стэндзе камітэта свае дасягненні і тэхналогіі прадэманструюць вядучыя ўстановы і арганізацыі Міністэрства адукацыі, Нацыянальнай акадэміі навук Беларусі і Міністэрства аховы здароўя. Так, Рэспубліканскі навукова-практычны цэнтр трансфузіялогіі і медыцынскіх біятэхналогій экспануе антыкавідны імунаглабулін для лячэння пацыентаў з цяжкай формай інфекцыі COVID-19, а таксама пацыентаў з вірусным энцэфалітам і менінгаэнцэфалітам. Беларускі нацыянальны тэхнічны ўніверсітэт пакажа ўнікальную акустычную сістэму для лячэння скурных анкалагічных захворванняў, якая валодае больш высокай эфектыўнасцю ў параўнанні з традыцыйнымі методыкамі і пры гэтым дазваляе знізіць на 25 працэнтаў дозу апрамянення пацыента. Нацыянальная акадэмія навук прадставіць офісны суперкамп'ютар, які мае невялікія габарыты і ўстанаўліваецца на звычайным працоўным месцы, пры гэтым забяспечвае правядзенне складаных навуковых разлікаў і апрацоўку вялікай колькасці даных, а Беларускі дзяржаўны ўніверсітэт - прэпараты для аховы раслін на аснове натуральных кампанентаў, якія могуць выкарыстоўвацца ў арганічным земляробстве.

"Адносіны паміж Беларуссю і Кітаем у сферы навукі і інавацый дынамічна развіваюцца. За апошнія гады павялічылася як колькасць, так і маштаб сумесных навукова-тэхнічных праектаў, і сёння на Кітайскай міжнароднай выстаўцы імпарту мы прадстаўляем распрацоўкі сусветнага ўзроўню", - падкрэсліў Аляксандр Шумілін. Ён таксама паведаміў, што 19 лістапада 2020 года запланавана правядзенне трэцяга пасяджэння Камісіі па навукова-тэхнічным супрацоўніцтве Беларуска-Кітайскага міжурадавага камітэта па супрацоўніцтве. Плануецца, што ў яго рабоце прыме ўдзел міністр па навуцы і тэхналогіях КНР Ван Чжыган.

Нацыянальная экспазіцыя Беларусі ў рамках трэцяй Кітайскай міжнароднай выстаўкі імпарту ў анлайн-фармаце прадоўжыцца да 14 студзеня 2021 года. Яна будзе разгорнута на інтэрактыўнай выставачнай платформе www.temex2020.com, у рамках якой беларускія вытворцы на віртуальных выставачных стэндах змогуць прадэманстраваць кітайскаму бізнесу шырокі спектр прадукцыі і паслуг, перспектыўных для прасоўвання на кітайскі рынак.

версія для друку

зрабіць стартавай

дабавіць у выбранае